Müdafiə Sənayesində Kadr Siyasəti və İstehsalat Problemləri
Müdafiə Sənayesi Nazirliyinin rəhbərliyində, xüsusilə də son nazir təyinatından sonra, ciddi kadr problemləri və istehsalatda dayanıqlılığın pozulması ilə bağlı iddialar səsləndirilir. Məlumata görə, nazirliyin tabeliyindəki zavodlara istehsalat sahəsindən kənar, təcrübəsiz şəxslərin, o cümlədən nazirin yaxın qohum və dostlarının gətirilməsi istehsalatın çökməsinə səbəb olmaqdadır. Uzun illərini müdafiə sənayesinə həsr etmiş təcrübəli mühəndis və idarəçilər kənarlaşdırılaraq, onların yerinə istehsalatdan xəbəri olmayan kadrların yüksək əməkhaqqı ilə vəzifələrə təyin edildiyi bildirilir.
Abas Quliyev Təyinatı və Vəzifə Artımı
Nazir Vüqar Mustafayevin ən yaxın dostu və sinif yoldaşı Abas Quliyevin təyinatı diqqət çəkən məqamlardan biridir. Abas Quliyev 2023-cü ilin ortalarında, Vüqar Mustafayevin hələ nazir müavini olduğu dövrdə, istehsalat və zavod sahəsində heç bir təcrübəsi olmadan Bakı Cihazqayırma Zavodu MMC-yə nəzarət etmək üçün işə qəbul edilmişdi. Nazir təyin edildikdən sonra Vüqar Mustafayev köhnə kadrları təzyiq və hədə-qorxu ilə vəzifələrindən azad edərək, yerlərinə təcrübəsiz kadrlarını təyin etməyə başladı. İlk addımlarından biri olaraq, nazir sinif yoldaşını, zavodun direktordan sonra ən böyük vəzifəsi sayılan baş mühəndis vəzifəsinə gətirdi. Halbuki, bu vəzifədə çalışmaq üçün uzun illər zavodun istehsalatında təcrübə toplamaq tələb olunur. İstehsalatdan anlayışı olmayan, ömrü boyu “Grand Agro MMC”də xidmət üzrə aparıcı koordinator və xidmət mərkəzi meneceri işləmiş Abas Quliyevin baş mühəndis təyin edilməsi böyük narazılıqlara səbəb olmuşdur.
“Zireh” MMC-nin Yaradılması və Kadr Siyasəti
Bakı Cihazqayırma Zavodu MMC-də baş mühəndis işlədiyi müddətdə Abas Quliyev sabiq nazir Mədət Quliyevin kadrlarını işdən azad edərək boşalmış vəzifələrə özünün yarıtmaz komandasını yığmağa başlamışdı. “Azərsilah” Müdafiə Sənayesi Holdinqi QSC yaradıldıqdan sonra “Zireh” MMC-nin də təsis ediləcəyi elan edildi. Yeni yaradılacaq “Zireh” MMC-yə hansı zavodların tabe olacağı və kimin rəhbər təyin ediləcəyi barədə müzakirələr gedirdi. Əvvəlcə “Üfüq İstehsalat Birliyi”nin və Radioquraşdırma zavodunun baş direktoru Rızabəy Məmmədovun “Zireh” MMC-yə rəhbər təyin ediləcəyi barədə söhbətlər gəzirdi. Lakin Aqreqat İstehsalat Birliyi və Bakı Cihazqayırma Zavodunun direktoru Elşən Atayevin göstərişi ilə Rızabəy Məmmədovun zavoda buraxılmaması, nəticədə istehsalatı bilən Rızabəy Məmmədovun yolunun kəsilməsi və Abas Quliyevə yol açılması iddia edilir. Nəticədə, 2024-cü il oktyabrın 18-də “Zireh” MMC yaradıldı və Abas Quliyev direktor təyin edildi. Saleh Mahmudov isə kadr işlərindən anlayışı olmamasına baxmayaraq, “Zireh” MMC-nin İnsan Resursları departamentinin direktoru vəzifəsinə gətirildi.
Zavodların Vəziyyəti və Maliyyə İddiaları
“Zireh” MMC-nin tabeliyinə “Azon zavodu”, “Bakı Cihazqayırma zavodu”, “Neftqazavtomat zavodu”, “MAKA-nın Kosmik Cihazqayırma Təcrübə zavodu” və “Peyk zavodu” verildi. Maraqlısı budur ki, bu zavodlar əvvəllər MMC olaraq Birliklərə tabe fəaliyyət göstərirdi. İndi isə həm MMC adı ilə, həm də zavod adı ilə fəaliyyət göstərən qurumlar mövcuddur. Bu, “Azərsilah” QSC və Müdafiə Sənayesi Nazirliyinin MMC kimi qalan zavodlara öz kadrlarını direktor təyin edərək qazanc əldə etmək məqsədi güddüyü kimi qəbul edilir. Optika Mexanika İstehsalat Birliyinin tabeliyində fəaliyyət göstərən Azon Zavodu MMC-nin bir ildən çoxdur ərazisi “Avantpark” yaşayış kompleksinə verilməsinə baxmayaraq, hələ də fəaliyyət göstərməsi və direktorunun olması suallar doğurur. Eyni zavodun iki adı və iki direktorunun olması, prezidentin müdafiə sənayesinin inkişafı üçün ayırdığı vəsaitlərin mənimsənilməsi məqsədi güddüyü kimi yozulur. Hal-hazırda bütün zavodlarda işlərin dayandığı bildirilir. İstehsalatdan xəbəri olmayan, heç vaxt istehsalatda işləməyən Abas Quliyevin dostu Yadigar Mustafayev “Agro Motors Azərbaycan MMC”də ehtiyat hissələri meneceri işlədiyi halda, Bakı Cihazqayırma Zavoduna istehsalat üzrə direktor müavini təyin edilib. Zavodun sexlərini tanımayan Yadigar Mustafayev hər ay 7 min manat əməkhaqqı alır, halbuki bir çox işçi onun adını eşitsə də, üzünü belə görməyib. İşçilər otaqda oturan yüksək rütbəli kadrların böyük, sexlərdə çalışanların isə aşağı əməkhaqqı almasından narazıdırlar.
Narazı işçilərə yaxın zamanda strukturun yeni ştat cədvəlinin təsdiqlənəcəyi və əməkhaqqının yaxşılaşacağı vəd olunsa da, vəziyyət dəyişməyib. Direktor Abas Quliyevin özü belə, əməkhaqqı məsələsində “Azərsilah” QSC-ni günahlandıraraq məsuliyyətdən yayınır. Bu isə nazir Vüqar Mustafayevin Azərsilah QSC və “Zireh” MMC-ni öz yaxınlarına 2-3 vəzifəni icra etdirmək və yüksək maaş almalarını təmin etmək, sexlərdə əziyyət çəkən fəhlələrin isə aşağı əməkhaqqı ilə onları dolandırması məqsədi daşıdığı kimi anlaşılır. İki ilə yaxındır ki, köhnə sistem qalıb, sadəcə adlar dəyişib. Prezident İlham Əliyev əhalinin sosial rifahını yaxşılaşdırmaq üçün sərəncamlar və fərmanlar verərək əməkhaqqı artımları etsə də, Müdafiə Sənayesi Nazirliyinin tabeliyindəki zavodlarda cəmi 7 faiz artım tətbiq olunur. Ölkə başçısının müdafiə sənayesinin inkişafı üçün 2024-cü ildə ayırdığı 1 milyard manat vəsaitin mənimsənilməsi iddiaları isə, sənayenin gələcəyi ilə bağlı ciddi narahatlıqlar yaradır. Üstəlik, struktur təsdiq olunmadığı halda yeni işçilərin yüksək əməkhaqqı ilə işə qəbul edilməsi də idarəetmədəki ziddiyyətləri ortaya qoyur.
