Anım Mərasimi və Ziyarətlər
Azərbaycan Polisinin yaranmasının 107-ci ildönümü münasibətilə ölkənin daxili işlər naziri, general-polkovnik Vilayət Eyvazov və Nazirliyin rəhbər heyəti Fəxri xiyabana gələrək ulu öndər Heydər Əliyevin abidə kompleksi önünə əklil qoyublar. Həmçinin görkəmli oftalmoloq alim, akademik Zərifə xanım Əliyevanın xatirəsi ehtiramla yad edilib. Ardınca, respublikanın ərazi bütövlüyü və suverenliyi uğrunda canından keçmiş qəhrəman mübarizlərin uyuduğu Şəhidlər xiyabanı da ziyarət olunub.
“Polis Günü” Tədbiri və Çıxışlar
Daxili İşlər Nazirliyinin Polis Akademiyasında “Polis Günü”nə və 2024-2025-ci tədris ilinin buraxılışına həsr olunmuş təntənəli mərasim keçirilib. Tədbirdə əvvəlcə ümummilli lider Heydər Əliyevin, eləcə də ölkəmizin ərazi bütövlüyü uğrunda şəhidlik zirvəsinə ucalmış və xidməti vəzifələrini yerinə yetirərkən həlak olmuş polis əməkdaşlarının xatirəsi dərin ehtiramla anılıb.
Peşə bayramı münasibətilə şəxsi heyətə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin təbrik və xoş arzularını çatdıran general-polkovnik Vilayət Eyvazov, Azərbaycan Polisinin geridə qoyduğu 107 illik şərəfli xidmət yolundan, yaratdığı dəyərli ənənələrdən, xüsusən də ulu öndər Heydər Əliyevin rəhbərliyi dövründə daxili işlər orqanlarının fəaliyyətinin təşkili və milli ruhlu vətənpərvər kadrlarla möhkəmlənməsi sahəsində görülən mühüm işlərdən bəhs edib.
Daxili İşlər Nazirliyində Aparılan İslahatlar
Vilayət Eyvazov çıxışında Prezident İlham Əliyevin xüsusi diqqət və qayğısı sayəsində Daxili İşlər Nazirliyində güclü və müasir maddi-texniki bazanın yaradıldığını, zamanın tələblərindən irəli gələn struktur dəyişikliklərinin həyata keçirildiyini vurğulayıb. O, həmçinin şəxsi heyətin sosial müdafiəsinin gücləndirilməsi, peşə hazırlığının artırılması və əməliyyat-xidməti fəaliyyətin vətəndaş məmnuniyyəti prinsipləri üzərində qurulması ilə bağlı sistemli tədbirlərin uğurla davam etdirildiyini bildirib. Polis orqanlarının cinayətkarlığa, onun transmilli növlərinə qarşı mübarizədə, asayişin və təhlükəsizliyin təmin olunmasında önəmli xidmətləri ilə seçildiyini, hər bir şəxsin qanuni mənafeyini, hüquq və azadlığını yüksək səviyyədə təmin etdiyini xüsusi qeyd edib.
Vətən Müharibəsi və Gələcək Vəzifələr
Müzəffər Ali Baş Komandan cənab İlham Əliyevin rəhbərliyi altında möhtəşəm qələbəmizlə nəticələnən Vətən müharibəsindən sonra regionda yaranmış yeni reallıqlara da toxunulub. İşğaldan azad edilmiş ərazilərdə “Böyük Qayıdış”ın gerçəkləşməsi üçün Azərbaycan Polisi orqanlarının, o cümlədən Daxili Qoşunların fəaliyyətinin mövcud vəziyyətə uyğunlaşdırıldığı, asayişin və təhlükəsizliyin etibarlı təmin edildiyi, xidmətin böyük əzm və peşəkarlıqla davam etdirildiyi qeyd olunub. Şəxsi heyətin diqqətinə çatdırılıb ki, xidməti vəzifələrin dəqiq və qüsursuz yerinə yetirilməsində dürüstlük, prinsipiallıq və məsuliyyət böyük önəm daşıyır. Cinayətlərin açılmasının yüksək səviyyədə saxlanılması, hüquqpozmaların profilaktikasının yaxşılaşdırılması, orqan və hissələrin mürəkkəb şəraitdə xidmət aparmaq bacarıqlarının artırılması, bütövlükdə xalqa xidmət funksiyalarının daha təkmil icrası başlıca vəzifələrdir.
Təşəkkür və Öhdəlik Bəyanatı
Daxili işlər orqanlarına xidməti vəzifələrin icrasında hər zaman yardımçı olan və polisin peşə bayramının sevincini bölüşən vətəndaşlara, daxili işlər orqanlarının veteranlarına, dövlət qurumlarının rəhbərlərinə, əməkdaşlarına, qeyri-hökumət təşkilatlarına və media nümayəndələrinə təşəkkür ifadə olunub. Qazanılan uğurlarda Azərbaycan Polisinin müasir dünyagörüşlü yeni nəslini Vətənə, dövlətə, xalqa sevgi və xidmət ruhunda yetişdirən Polis Akademiyasının rolunu xüsusi qeyd edən nazir, məzunları təhsili başa vurmaları münasibətilə təbrik edib, həmçinin baş leytenant rütbəsi ilə bitirən məzunlara fərqlənmə diplomlarını təqdim edib.
General-polkovnik Vilayət Eyvazov təntənəli mərasimin iştirakçıları adından Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevi əmin edib ki, andına həmişə sadiq olan daxili işlər orqanları bundan sonra da Vətənə və xalqa şərəflə xidmət edəcək, bu yolda qüvvə və bacarığını əsirgəməyəcək. Təntənəli tədbir şəxsi heyətin mətin addımlarla tribuna qarşısından keçidi ilə yekunlaşıb.
