Qanunsuz Estetik Fəaliyyət: Dr. Ella Həsənzadənin İddiaları Aşkarlanıb
Sosial mediada özünü estetik həkim kimi təqdim edən “Dr. Ella Hezenzade” adlı şəxsin fəaliyyəti ilə bağlı ciddi iddialar ortaya çıxıb. Belə ki, adı çəkilən şəxsin tibbi təhsili və müvafiq lisenziyası olmadan müxtəlif estetik prosedurlar həyata keçirdiyi bildirilir. Ölkədə tibbi təhsili olmayan şəxslərin gizli şəkildə fəaliyyət göstərməsi halları hüquq-mühafizə orqanları tərəfindən tənzimlənsə də, bu cür halların sayı azalmır.
Ella Həsənzadənin Fəaliyyəti və Nazirliyin Tələbləri
Bakıda sosial hesablarında “Dr. Ella” ləqəbi ilə tanınan Ella Həsənzadənin çənə xəttinin bərpası, liposaksiya, abdominal plastika, sinə kiçiltmə, otoplastika kimi geniş çeşidli estetik əməliyyatları, o cümlədən, süni gəlin bərpası və blefaroplastika kimi prosedurları endirim adı altında həyata keçirdiyi qeyd olunur. Bu prosedurların görüntülərinin sosial şəbəkələrdə paylaşılması, Səhiyyə Nazirliyinin icazə və tələblərinin göz ardı edildiyi şübhəsini yaradır. Səhiyyə Nazirliyinin Analitik Ekspertiza Mərkəzinin məlumatına görə, kosmetoloji və cərrahi xidmətlər təqdim edən istənilən estetik tibb müəssisəsi üçün xüsusi lisenziya tələb olunur. Tibbi kosmetologiya, cərrahi müdaxilələr istisna olmaqla, inyeksion prosedurlar, müxtəlif növ aparat kosmetologiyası, biorevitalizasiya, mezoterapiya, pilinq, müalicəvi masaj və plazmoliftinq kimi üsulları əhatə edir. Bu sahədə praktiki fəaliyyət üçün müvafiq sertifikata malik plastik-cərrahlar, həkim-dermatovenereoloqlar və ixtisaslaşma keçmiş digər həkim mütəxəssislər fəaliyyət göstərə bilər. Hər bir pasiyentin həkimin sertifikatını tələb etmək hüququ var.
Təhsil və Lisenziya ilə bağlı Şübhələr
Araşdırmalar nəticəsində “estetik həkim” Ella Həsənzadənin Səhiyyə Nazirliyi və Elm və Təhsil Nazirliyinin məlumat bazasında ali tibb təhsili və sertifikasiyası barədə məlumatların olmadığı aşkarlanıb. Dövlət Reyestrində də onunla bağlı heç bir qeyd yoxdur. Bu da o deməkdir ki, o, heç bir ali tibbi təhsili, tibbi sertifikata və lisenziyaya malik olmadan qanunsuz estetik fəaliyyət göstərir. Eyni zamanda, sosial şəbəkələrdə lisenziyasız kosmetoloji və estetik fəaliyyətlə bağlı, hətta vaxtı keçmiş preparatların istifadəsi ilə bağlı iddialar da mövcuddur.
Hüquqi Çərçivə və Mövqe
Azərbaycan Respublikasının Qanununa əsasən tibb xidməti fəaliyyətinin göstərilməsi üçün lisenziya tələb olunur. Nazirlər Kabinetinin 15 may 2017-ci il tarixli 206 nömrəli Qərarı ilə təsdiq olunmuş “Özəl tibb fəaliyyəti üzrə lisenziyalaşdırılan xidmətlərin və işlərin Siyahısı”nda “kosmetoloji” iş üzrə tibbi xidmətin göstərilməsi tibbin bir sahəsi kimi qeyd olunur. Bu üsulların hamısı “kosmetoloji” işə aid olduğundan, müvafiq iş üzrə özəl tibb xidməti fəaliyyətinin göstərilməsi üçün lisenziya tələb olunur. Qeyd edək ki, Səhiyyə Nazirliyi Azərbaycanda cəmi 42 həkimin plastik cərrah kimi fəaliyyətinə icazə verib və onların siyahısı rəsmi dərc olunub. Məsələ ilə bağlı “Dr. Ella” kimi təqdim edilən Ella Həsənzadədən açıqlama almaq cəhdləri isə nəticəsiz qalıb, telefon zənglərinə cavab verilməyib. Qarşı tərəfin mövqeyini dərc etməyə hazırıq. Araşdırmalar davam edir.
