Rusiyada Azərbaycana Qarşı Sistematik Təxribatlar Narahatlıq Yaradır
Rusiya Federasiyasının Yekaterinburq şəhərində azərbaycanlılara qarşı həyata keçirilən son əməliyyatlar ciddi narazılıq və narahatlıq doğurur. Bir çox həmvətənimizin ağır bədən xəsarətləri alması, iki nəfərin həyatını itirməsi və doqquz nəfərin saxlanılması ilə nəticələnən bu əməliyyatın Federal Təhlükəsizlik Xidməti kimi rəsmi statuslu bir qurum tərəfindən həyata keçirilməsi əlavə suallar doğurur. Baş verənlər hüquq-mühafizə orqanının əməliyyatından daha çox, təxribat xarakterli bir hadisəyə bənzəyir. Rusiya tərəfinin bu məsələ ilə bağlı izah verici açıqlamalar təqdim etməsi, həmçinin zorakılığı törədənləri cəzalandırması vacib şərtdir.
Artan Gərginlik və Ardıcıl Hadisələr Zənciri
Azərbaycan tərəfində narazılıq və narahatlığı artıran digər məqamlar da mövcuddur. Problem ondadır ki, Yekaterinburqda baş verən hadisə Rusiya Federasiyası ərazisində son bir il ərzində azərbaycanlılara qarşı yönəlmiş yeganə insident, daha doğrusu, təxribat əməli deyil. 2024-cü ilin dekabr ayında Azərbaycan mülki təyyarəsinin vurulması insidentinə hələlik qaneedici formada münasibət sərgilənməyib. Rusiya hüquq-mühafizə orqanlarının bu məsələdəki susqun davranışı və hərəkətsizliyi narazılığı artıran əsas faktorlardandır. Həmçinin Həştərxanda keçirilən tədbirə dəvət olunmuş Milli Məclisin deputatı Azər Badamovun Rusiya ərazisinə buraxılmaması, yaxud bu ilin fevral ayında eyni nöqtədən Azərbaycanın informasiya resurslarına qarşı kiberhücumların təşkil olunması istər-istəməz belə rəy yaradır ki, Rusiya ərazisində hansısa mərkəzlər Azərbaycana qarşı düşünülmüş formada təxribat planları hazırlayıb həyata keçirirlər.
Münasibətlərin Gələcəyi və Beynəlxalq Müstəviyə Keçid Tələbi
Belə bir yanaşma Azərbaycanı baş verən təxribatlarla bağlı beynəlxalq prosedurlara əl atmağa məcbur edir. Məsələn, təyyarə mövzusunu beynəlxalq müstəvidə inkişaf etdirmək, günahkarların cəzalandırılması üçün beynəlxalq platformalarda iş qaldırmaq zəruridir. Yaxud, Solovyov kimi təxribatçıların Rusiyanın rəsmi media subyektlərində anti-Azərbaycan çıxışlarına cavab olaraq, Azərbaycan mediasında da anti-Rusiya təbliğatına başlamaq lazım gələ bilər. Görünür, təxribatları həyata keçirən mərkəzlər də Azərbaycanı məhz buna sövq etmək istəyirlər. Onlar iki ölkə arasında münasibətləri yaxın qonşuluq kontekstindən çıxarıb qarşıdurma müstəvisinə keçirməyə nail olmağa çalışırlar. Ümid edilir ki, Rusiya Federasiyası törədilən təxribatların fərqinə varacaq və təxribatı törədənlərin cəzalandırılmasını təmin edəcək.
