Bakı Hərbi Məhkəməsində Ruben Vardanyanın İşinə Baxış Davam Edib
Bakı, 1 iyul – Azərbaycan Respublikasının Cinayət Məcəlləsinin müxtəlif maddələri, o cümlədən sülh və insanlıq əleyhinə cinayətlər, müharibə cinayətləri, terrorçuluq və terrorçuluğun maliyyələşdirilməsi ilə bağlı ağır ittihamlarla təqsirləndirilən Ermənistan vətəndaşı Ruben Vardanyanın cinayət işi üzrə məhkəmə prosesi iyulun 1-də davam etdirilib.
Bakı Hərbi Məhkəməsində, hakim Zeynal Ağayevin sədrliyi ilə Anar Rzayev və Camal Ramazanovdan ibarət tərkibdə keçirilən açıq məhkəmə iclasında (ehtiyat hakim Günel Səmədova) təqsirləndirilən şəxs öz bildiyi dildə, yəni rus dilində tərcüməçi, habelə müdafiəsi üçün seçdiyi vəkillə təmin olunub.
Zərərçəkənlərin Hüquqları və Vəkilin Müraciəti
Hakim Zeynal Ağayev dindirmədən əvvəl məhkəmədə ilk dəfə iştirak edən zərərçəkmiş şəxslərə və onların hüquqi varislərinə qanunvericiliklə nəzərdə tutulmuş hüquqlarını və vəzifələrini izah edib.
Daha sonra təqsirləndirilən Ruben Vardanyanın hüquqlarını müdafiə edən vəkili Avraam Berman məhkəməyə müraciət edərək, iyunun 23-də məhkəmə kollegiyası tərəfindən fevralın 13-də və 17-də keçirilmiş məhkəmə iclaslarının protokolları ilə tanış olmaq üçün şərait yaradıldığını bildirib. O, hazırda məhkəmə hazırlıq iclasında qəbul edilmiş və protokolda əksini tapmış qərarla tanış olmaq istəklərini ifadə edib. Müdafiə tərəfi, eyni zamanda, həmin tarixlərdə keçirilən iclaslarda verdikləri vəsatətlərin təmin olunmasına dair qərarların çıxarışının da onlara verilməsini xahiş edib. Təqsirləndirilən Ruben Vardanyan da vəkilinin müraciətini müdafiə edib. İclasa sədrlik edən hakim Zeynal Ağayev, indiyədək təqsirləndirilən şəxs və onun müdafiəçisi hansı sənədlərlə tanış olmaq istəyibsə, bunun üçün şərait yaradıldığını və yenə də əvvəl olduğu kimi təmin ediləcəyini vurğulayıb.
Ermənistan Təcavüzünün Qurbanları İfadə Verdi
Məhkəmədə Ermənistanın təcavüzkar müharibəsi və işğalçılıq siyasəti nəticəsində törədilmiş cinayət hadisələri zamanı zərərçəkənlər, habelə zərərçəkmişlərin hüquqi varisləri ifadə veriblər.
Əvvəlcə zərərçəkmiş şəxs Sərxan Köklərovun hüquqi varisi qismində tanınmış qardaşı Absaləddin Köklərov ifadəsində qardaşının Ağdərədə Ermənistan ordusunun qalıqları və qanunsuz erməni silahlı dəstələrinin açdığı atəş nəticəsində yaralanaraq beş gün sonra hospitalda dünyasını dəyişdiyini söyləyib. Hüquqi varis Tahir Qasımov isə övladı Hacıəli Qasımovun Xankəndi şəhəri yaxınlığında snayperlə vurulduğunu, Respublika Neyrocərrahiyyə Xəstəxanasında koma vəziyyətində qaldığını və dörd ay sonra vəfat etdiyini bildirib. Zərərçəkmiş Mirzəhəsən Səfərəliyev Ağdamda odlu silahdan açılmış atəş nəticəsində güllə yarası aldığını qeyd edib; Baş Prokurorluğun Dövlət ittihamının müdafiəsi üzrə idarəsinin şöbə rəisi Nəsir Bayramovun sualına cavabında həmin vaxt yaxınlığındakı beş nəfərin də yaralandığını, bir nəfərin isə snayper atəşi nəticəsində həlak olduğunu bildirib. Asiman Cəfərov da Ağdamda snayper gülləsindən xəsarət aldığını ifadə edib. Sənan Hüseynov dövlət ittihamçısı Fuad Musayevin sualına cavabında Ağdam rayonunda düşmən tərəfindən açılmış atəşlər nəticəsində özünün və yanındakı bir neçə şəxsin yaralandığını, bir neçə nəfərin isə həlak olduğunu söyləyib. Xəqani Abbasov Ağdam rayonunda Ermənistan ordusunun qalıqları və qeyri-qanuni erməni silahlı dəstələrinin açdığı atəş nəticəsində yaralandığını deyib. Eltun Məmmədov Ağdam rayonunun Xanabad kəndi istiqamətində düşmən tərəfindən atılmış minaatan mərmisinin partlaması nəticəsində yaralandığını söyləyib. İbrahim Hüseynov Xocavənd rayonunda düşmən tərəfindən atılmış mərminin partlaması nəticəsində qəlpə yarası aldığını bildirib. Ərəstunn Müftəliyev Ermənistan ordusunun qalıqlarının və qeyri-qanuni erməni silahlı dəstələrinin açdığı atəş nəticəsində xəsarətlər aldığını deyib. Elçin Pıçaxov Xocavənd istiqamətində odlu silahdan açılmış atəş nəticəsində yaralandığını və müalicəsinin hələ də davam etdiyini diqqətə çatdırıb. Rəşad Əliyev Xocalı istiqamətində düşmən tərəfindən açılan snayper atəşi nəticəsində yaralandığını, həmin vaxt Toğrul Osmanlının və Altay Əhədovun da xəsarət aldıqlarını söyləyib. Həmzə Mahmudov Xocalıda olduğu zaman artilleriya mərmisinin yaxınlığına düşərək partlaması nəticəsində xəsarət aldığını bildirib. Digər zərərçəkmiş Azad Məmmədov isə dövlət ittihamçısı Təranə Məmmədovanın sualına cavabında Şuşa rayonunun Xəlfəli kəndində minaatan mərmisinin partlaması nəticəsində yaralandığını deyib. Tural Əliyev Kəlbəcərdə qumbaraatan mərmisinin partlaması nəticəsində yaralandığını və aldığı xəsarətlərə görə altı ay yataq xəstəsi olduğunu qeyd edib. Zülfü Qasımov Ermənistan silahlı qüvvələrinin qalıqları və qanunsuz erməni silahlı dəstələrinin genişmiqyaslı təxribatı nəticəsində Kəlbəcər istiqamətində yaralandığını bildirib. O, dövlət ittihamçısı Vüsal Abdullayevin suallarına cavabında həmin vaxt düşmənin atdığı minaatan mərmisinin partlaması nəticəsində bir nəfərin həlak olduğunu, bir neçə nəfərin isə yaralandığını deyib. Sənan Mehdiyev erməni hərbçilərinin açdıqları atəş nəticəsində xəsarət aldığını söyləyib. Nurlan Zeynalov Xocalıda düşmənin atdığı atəş nəticəsində sol ayağından yaralandığını söyləyib. Şəmsi Nəbiyev Xocavənddə artilleriya atəşi nəticəsində yaralandığını vurğulayıb. Rahid Cəfərov, Samir Novruzov, Asiman Məmmədrzayev, Ceyhun Batıyev, Məmmədtağı Rüstəmov, Aydın Tanrıverdiyev, Valeh Mirzəliyev Ermənistan ordusunun qalıqları və qeyri-qanuni erməni silahlı dəstələrinin açdığı atəşlər nəticəsində xəsarət aldıqlarını bildiriblər. Rahid Cəfərov Baş prokurorun xüsusi tapşırıqlar üzrə köməkçisi Tuqay Rəhimlinin sualına cavabında Ağdərə rayonunun Canyataq kəndi ərazisində snayper atəşi nəticəsində xəsarət aldığını qeyd edib. Güloğlan Əmiraslanov Xocavənd rayonunda düşmən tərəfindən atılmış “Faqot” tankəleyhinə idarəolunan raketin partlaması nəticəsində yaralandığını söyləyib. Kamran Həsənov Ağdam rayonunun Əliağalı kəndi ərazisində Ermənistan ordusunun qalıqları və qeyri-qanuni erməni silahlı dəstələrinin atdığı minaatan mərmisinin yaxınlığına düşüb partlaması nəticəsində yaralandığını ifadə edib. Baş prokurorun böyük köməkçisi Vüsal Əliyevin sualını cavablandıran zaman o, hadisə zamanı yanında olan Allahverdi Səfiyev və Elnur Kərimovun həlak olduğunu bildirib. İftixar Abdullayev Kəlbəcər rayonunda Ermənistan ordusunun qalıqları və qeyri-qanuni erməni silahlı dəstələrinin açdığı atəş nəticəsində yaralandığını deyib. Rahib Məmmədov Kəlbəcərdə düşmənin ağır artilleriyadan açdığı atəş nəticəsində xəsarətlər aldığını söyləyib. Rahil Xəlilov, Tural Səmədov, Yamin Məmmədov, Elgün Musayev Ermənistan ordusunun qalıqları və qeyri-qanuni erməni silahlı dəstələrinin müxtəlif istiqamətlərdə açdığı atəş nəticəsində yaralandıqlarını söyləyiblər.
Ekspertiza Rəyləri və Növbəti İclas
Məhkəmə prosesində, həmçinin zərərçəkmiş şəxslərin barələrində keçirilmiş məhkəmə-tibbi ekspertizasının rəyləri elan edilib. Məhkəmə prosesinin növbəti iclası iyulun 8-də təyin olunub.
Ruben Vardanyana Qarşı İttihamlar
Xatırladaq ki, Ruben Vardanyan Azərbaycan Respublikası Cinayət Məcəlləsinin 100.1 (təcavüzkar müharibəni planlaşdırma, hazırlama, başlama və aparma), 100.2 (təcavüzkar müharibəni planlaşdırma, hazırlama, başlama və aparma), 107 (əhalini deportasiya etmə və məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrum etmə), 113 (işgəncə), 114.1 (muzdluluq), 115.2 (müharibə qanunlarını və adətlərini pozma), 116.0.1 (silahlı münaqişə zamanı beynəlxalq humanitar hüquq normalarını pozma), 116.0.2 (silahlı münaqişə zamanı beynəlxalq humanitar hüquq normalarını pozma), 116.0.10 (silahlı münaqişə zamanı beynəlxalq humanitar hüquq normalarını pozma), 116.0.11 (silahlı münaqişə zamanı beynəlxalq humanitar hüquq normalarını pozma), 116.0.16 (silahlı münaqişə zamanı beynəlxalq humanitar hüquq normalarını pozma), 116.0.18 (silahlı münaqişə zamanı beynəlxalq humanitar hüquq normalarını pozma), 120.2.1 (qəsdən adam öldürmə), 120.2.3 (qəsdən adam öldürmə), 120.2.4 (qəsdən adam öldürmə), 120.2.7 (qəsdən adam öldürmə), 120.2.11 (qəsdən adam öldürmə), 120.2.12 (qəsdən adam öldürmə), 29,120.2.1 (qəsdən adam öldürməyə cəhd), 29,120.2.3 (qəsdən adam öldürməyə cəhd), 29,120.2.4 (qəsdən adam öldürməyə cəhd), 29,120.2.7 (qəsdən adam öldürməyə cəhd), 29,120.2.11 (qəsdən adam öldürməyə cəhd), 29,120.2.12 (qəsdən adam öldürməyə cəhd), 192.3.1 (qanunsuz sahibkarlıq), 214.2.1 (terrorçuluq), 214.2.3 (terrorçuluq), 214.2.4 (terrorçuluq), 214-1 (terrorçuluğu maliyyələşdirmə), 218.1 (cinayətkar birlik yaratma), 218.2 (cinayətkar birlik yaratma), 228.3 (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1.2 (aviasiya təhlükəsizliyinə təhdid yaradan əməllər), 270-1.4 (aviasiya təhlükəsizliyinə təhdid yaradan əməllər), 278.1 (hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə), 279.1 (qanunvericiliklə nəzərdə tutulmayan silahlı birləşmələri və ya qrupları yaratma), 279.2 (qanunvericiliklə nəzərdə tutulmayan silahlı birləşmələri və ya qrupları yaratma), 279.3 (qanunvericiliklə nəzərdə tutulmayan silahlı birləşmələri və ya qrupları yaratma) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunur.
