Qurbanqulu Berdiməhəmmədov Bakıda Zəfər parkını ziyarət etdi
Bakı, 16 iyul. Türkmənistan Xalq Məsləhətinin sədri iyulun 16-da paytaxt Bakıda yerləşən Zəfər parkını ziyarət edib. Qonağın şərəfinə parkın ərazisində fəxri qarovul dəstəsi düzülmüşdü. Ziyarət zamanı o, parkdakı Zəfər abidəsinin önünə əklil qoyaraq hörmətini ifadə edib.
Vətən müharibəsi qəhrəmanlığının təcəssümü
Daha sonra yüksək qonağa Azərbaycan xalqının Vətən müharibəsində göstərdiyi misilsiz qəhrəmanlıq, qazandığı möhtəşəm tarixi Zəfər və şəhidlərimizin əziz xatirəsinin əbədiləşdirilməsi məqsədilə yaradılmış park barədə ətraflı məlumat verilib. Bildirilib ki, təqribən 10 hektar ərazini əhatə edən parkın girişində 44 günlük Vətən müharibəsinin rəmzi olaraq hündürlüyü 44 metr, eni 22 metr və sütunlarının sayı 44 olan Zəfər tağı ucaldılıb.
Xatırladaq ki, Prezident İlham Əliyev və birinci xanım Mehriban Əliyevanın iştirakı ilə parkın açılışı 2021-ci il noyabrın 8-də baş tutub.
