Badamdar qəsəbəsi, 1-ci yaşayış massivində yaşayan sakinlər qonşuluqda yerləşən qalmaqallı Laçın qaçqın məktəbinin direktoru Piyalə Xudayarovanı məhkəməyə veriblər. Sakinlər bildirirlər ki, məktəbə gedən yol rəhbərlik və bələdiyyə işçiləri tərəfindən qanunsuz satılıb, yerində bina tikilib. Nəticədə, heç bir sənədi olmayan məktəbə aparan yol sakinlərin həyətindən keçir. Dar yolda avtomobillərin hərəkəti sakinlərin həyatına ciddi çətinlik və təhlükəsizlik problemləri yaradır.
Qanunsuz Tikili və Direktorun Müqaviməti
Yerli sakin Zəminə Zahirova qeyd edib ki, direktor Piyalə Xudayarova cəmi 60-a yaxın şagirdi olan, qanunsuz fəaliyyət göstərən məktəbin digər təhsil ocağına köçürülməsinə müqavimət göstərir. O, məcburi köçkün adından və məktəbin guya şəhid adını daşımasından sui-istifadə edərək vətəndaşların hüquqlarını pozur. Sabah sözügedən iş üzrə Səbail Rayon Məhkəməsində hazırlıq iclası keçiriləcək. İclasa hakim Rəna Qafarova sədrlik edəcək.
Sənədsiz Məktəb: Hüquqi Əsasların Olmaması
Sakinlərin hüquqlarını müdafiə edən vəkil məhkəməyə müraciət edərək bildirib ki, bu tikili heç bir hüquqmüəyyənedici sənəd, müvafiq dövlət qurumlarının icazəsi və razılaşdırması olmadan özbaşına inşa edilib və “uyğunlaşdırılmış məcburi köçkün məktəbi” adı altında istifadə olunur. Vəkil vurğulayıb ki, bu tikilinin Elm və Təhsil Nazirliyinin balansında olması ilə bağlı heç bir sənəd mövcud deyil. Ərazidə yerləşən digər fərdi evlər kimi, bu bina da 2010-cu ildən sonra yaşayış üçün tikilib və əvvəllər taxta konstruksiyalı vaqon kimi istifadə olunub. Həmin vaqonlar sonradan genişləndirilərək özbaşına şəkildə tikiliyə – məktəbə çevrilib.
Məcburi Köçkün Adından Sui-istifadə İddiaları
Qeyd olunur ki, məcburi köçkünlərin Azərbaycanın müxtəlif ərazilərinə yerləşdirilməsi əsasən, 1994-cü ilə qədər baş verib. Bu dövrdə onlar əsasən, dövlətə və ya ayrı-ayrı fiziki şəxslərə məxsus əmlaklarda məskunlaşıblar. Bu baxımdan, Piyalə Xudayarovanın 2005, yaxud 2010-cu ildən sonra hazırkı mübahisəli tikililərin yerləşdiyi ərazilərdə guya “uyğunlaşdırılmış məktəb” açdığını iddia etməsi məntiqsiz və qanuna ziddir. Vəkil əlavə edib ki, bu əraziyə 1990-cı illərdə məcburi köçkünlərin yerləşdirilməsi ilə bağlı hər hansı rəsmi fakt yoxdur və bu da cavabdehin “qaçqın məktəbi” ifadəsindən sui-istifadə etdiyini göstərir.
Ərazi Mənimsəməsi və Təhlükəsizlik Riskleri
Ərizədə həmçinin bildirilib ki, cavabdeh bu tikilidən istifadə edərək sakinlərin, xüsusilə də iddiaçının mülkiyyət hüququnu pozur. Vəkilin sözlərinə görə, Piyalə Xudayarova iddiaçının evinə bitişik sahədə özbaşına dəmir məhəccər quraşdırmaqla, 1 metr enində torpaq sahəsini qanunsuz şəkildə mənimsəyib. Bundan başqa, o, tikilini guya Elm və Təhsil Nazirliyinə məxsus bina kimi təqdim edərək məsuliyyəti üzərindən atmağa çalışır. Halbuki, dövlətə məxsus bir bina olduğu təqdirdə, həmin tikilinin balans sənədi, hüquqi ünvanı və ya icarə müqaviləsi mövcud olmalı idi. Lakin belə sənədlər məhkəməyə təqdim olunmayıb.
Qurumların Qərarı və Prokurorluğa Müraciət
Vəkil əlavə edib ki, Laçın qaçqın məktəbi kimi təqdim olunan bu tikili uçuruma yaxın, təhlükəli ərazidə yerləşir, tikinti normalarına və təhlükəsizlik tələblərinə cavab vermir. Bu isə orada təhsil alan uşaqlar üçün ciddi risklər yaradır. Tikilinin yalnız piyada yolu ilə əlçatan olması, yanğın təhlükəsizliyi qaydalarına cavab verməməsi də əlavə təhlükə mənbəyi kimi qiymətləndirilir. Azərbaycan Respublikasının Dövlət Şəhərsalma və Arxitektura Komitəsi Yanında Bakı Şəhəri Memarlıq Və Şəhərsalma Baş İdarəsinin, Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin, eləcə də Səbail Rayon İcra Hakimiyyəti Başçısı Aparatının məktublarında müvafiq icazə və razılaşdırma sənədləri olmadan mübahisəli tikilinin qanunsuz və özbaşına olduğu qeyd olunub. Ərizədə Azərbaycan Respublikası Mülki Prosessual Məcəlləsinin 265-ci maddəsinə əsasən, xüsusi qərardan çıxarılaraq məsələnin Prokurorluğa göndərilməsi tələb olunur.
