Bakı, 30 iyun.
Milli Məclisdə Mərakeş nümayəndə heyəti ilə görüşlər
İyunun 30-da Milli Məclisin Mərakeşlə parlamentlərarası əlaqələr üzrə işçi qrupunun üzvləri Mərakeş Parlamentinin Nümayəndələr Palatasının Savadsızlığın aradan qaldırılması proqramlarının qiymətləndirilməsi üzrə tematik parlament qrupundan ibarət nümayəndə heyəti ilə görüşüblər.
Milli Məclisin İctimai birliklər və dini qurumlar komitəsinin sədri, Mərakeşlə əlaqələr üzrə işçi qrupunun üzvü Fazil Mustafa iki ölkə arasındakı münasibətlərdən bəhs edib. O, Azərbaycan və Mərakeş ali rəhbərlərinin səyləri ilə dostluğun və əməkdaşlığın daim inkişaf edib möhkəmləndiyini vurğulayıb. Komitə sədri parlamentlərarası münasibətlərin ölkələr arasındakı əlaqələrin inkişafına müsbət təsirindən danışaraq, bu istiqamətdə dostluq qruplarının əməkdaşlığının, parlamentarilərin beynəlxalq təşkilatlardakı birgə fəaliyyətinin əhəmiyyətini qeyd edib.
Mərakeş Parlamentinin nümayəndə heyətinin rəhbəri, Nümayəndələr Palatasının tematik parlament qrupu sədrinin müavini Hasan Umribt Azərbaycanla Mərakeşin dostluq və qardaşlıq prinsiplərinə əsaslanan münasibətlərini yüksək dəyərləndirib. Beynəlxalq arenada parlament diplomatiyasının artan nüfuzunu qeyd edən qonaq, bu əlaqələrin inkişaf etdirilməsi perspektivləri ilə bağlı fikirlərini bölüşüb.
Görüşdə Milli Məclisin Mərakeşlə parlamentlərarası əlaqələr üzrə işçi qrupunun üzvləri İlham Məmmədov və Pərvanə Vəliyeva, eləcə də Mərakeş nümayəndə heyətinin üzvü Fatima Yasin çıxış ediblər. Onlar Azərbaycan və Mərakeşin həm ikitərəfli formatda, həm parlamentlər səviyyəsində, həm də beynəlxalq platformalar çərçivəsində qarşılıqlı faydalı əməkdaşlığının davam etdirilməsinin əhəmiyyətini vurğulayıblar.
Söhbət zamanı elm, təhsil sahəsində əməkdaşlıq və qarşılıqlı maraq doğuran digər mövzular barədə fikir mübadiləsi aparılıb.
Elm və təhsil sahəsində əməkdaşlıq perspektivləri
Daha sonra Milli Məclisin Elm və təhsil komitəsinin üzvləri Mərakeşdən olan nümayəndə heyəti ilə görüşüblər.
Görüşdə Milli Məclisin Elm və təhsil komitəsinin sədri Anar İsgəndərov Azərbaycan və Mərakeş arasında uzun illərə söykənən dostluq və qardaşlıq münasibətlərinin mövcudluğunu vurğulayıb. Komitə sədri qeyd edib ki, Mərakeş Krallığı daim Azərbaycanın ərazi bütövlüyünü və suverenliyini tanıyıb, bu mövqeyi beynəlxalq müstəvidə dəstəkləyib. Bu gün müxtəlif sahələrdə əlaqələrin dərinləşməsi üçün geniş imkanlar mövcuddur.
Mərakeş Parlamentinin Nümayəndələr Palatasının tematik qrup sədrinin müavini Hasan Umribt iki ölkə arasındakı siyasi və humanitar əlaqələrin yüksək səviyyədə davam etdiyini bildirib. O, Mərakeşin təhsil sahəsində Azərbaycanın əldə etdiyi uğurlu təcrübədən faydalanmaq niyyətində olduğunu vurğulayıb.
Söhbətdə Milli Məclisin Elm və təhsil komitəsinin üzvləri Mehriban Vəliyeva, Ceyhun Məmmədov, Şahin Seyidzadə, eləcə də Mərakeşdən olan parlamentarilər Xadduj Slassi, El Ayaçi El Farfar, Yussef Çirri çıxış ediblər. Onlar təhsil sahəsində həyata keçirilən islahatlardan, təcrübə və informasiya mübadiləsinin əhəmiyyətindən, habelə bu sahədə gələcək əməkdaşlıq imkanlarından bəhs ediblər.
Görüşdə ikitərəfli əməkdaşlığın genişləndirilməsi, təhsildə birgə təşəbbüslərin həyata keçirilməsi, həmçinin bu sahədə qarşılıqlı təcrübə və məlumat mübadiləsinin əhəmiyyəti müzakirə olunub.
