Bakı, 14 iyul, AZƏRTAC
İyulun 14-də Milli Məclisin növbədənkənar sessiyasının sonuncu plenar iclası Sahibə Qafarovanın sədrliyi ilə baş tutub.
Heydər Əliyevin Hakimiyyətə Gəlməsinin 56-cı İldönümü
İclası açan Milli Məclisin sədri Sahibə Qafarova Ümummilli Lider Heydər Əliyevin 1969-cu ildə Azərbaycanda ali hakimiyyətə gəlməsinin 56-cı ildönümünün qeyd edildiyini vurğulayıb. O, Ulu Öndərin Vətən və xalq qarşısındakı misilsiz tarixi xidmətlərinin dərin minnətdarlıq hissi ilə xatırlandığını diqqətə çatdırıb.
Parlamentin sədri qeyd edib ki, Azərbaycan tarixinin təxminən otuz beş illik dövründə xalqımızın siyasi təkamülü, iqtisadi tərəqqisi və mənəvi yüksəlişi dünya miqyaslı siyasi və dövlət xadimi Heydər Əliyevin möhtəşəm fəaliyyəti ilə sıx bağlı olub. Müasir Azərbaycan məhz Ulu Öndərin xalqa məhəbbətinin və Vətən yolunda fədakarlığının bariz təcəssümüdür.
Sahibə Qafarova Ümummilli Liderin başladığı tarixi missiyanın hazırda Prezident İlham Əliyev tərəfindən uğurla davam etdirildiyini bildirib. Onun sözlərinə görə, Azərbaycan dünyanın geniş bir regionunda söz sahibi olan qüdrətli dövlətə çevrilib.
Sonra cari məsələlərlə bağlı müzakirələr zamanı bir sıra deputatlar çıxış edərək, Ulu Öndər Heydər Əliyevin Azərbaycanda birinci dəfə siyasi hakimiyyətə gəldiyi 1969-cu il 14 iyul tarixinin xalqımızın taleyindəki müstəsna rolunu bir daha vurğulayıblar.
Qanun Layihələrinin Müzakirəsi və Qəbulu
Parlament sədri Sahibə Qafarova gündəliyə 13 məsələnin daxil edildiyini, bunlardan ilk 11-nin üçüncü oxunuşda olan qanun layihələri olduğunu qeyd edib. İclasda bir sıra mühüm qanunvericilik aktları müzakirəyə çıxarılıb və qəbul olunub.
Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev “Müdafiə haqqında” Qanunda dəyişiklik edilməsi barədə qanun layihəsini təqdim edib. O, layihədə ərazi müdafiəsi ilə bağlı normanın təkmilləşdirilməsinin nəzərdə tutulduğunu bildirib.
İqtisadi siyasət, sənaye və sahibkarlıq komitəsinin üzvü Vüqar Bayramov Gömrük Məcəlləsində dəyişiklik edilməsi haqqında qanun layihəsinə dair məlumat verərək, layihədə gömrük borcunun ödənilməsi sahəsində məsul subyektlərin dəqiq müəyyənləşdirilməsinin ehtiva olunduğunu diqqətə çatdırıb.
Elm və təhsil komitəsinin sədri Anar İsgəndərov “Təhsil haqqında” və “Məktəbəqədər təhsil haqqında” qanunlarda dəyişiklik edilməsi barədə qanun layihəsi haqqında danışıb. Sənədə əsasən, məktəbəqədər təhsilin həyata keçirildiyi müəssisələr sırasına məktəbdənkənar təhsil müəssisələrinin də əlavə edilməsi təklif olunur.
Aqrar siyasət komitəsinin sədri Tahir Rzayev Torpaq Məcəlləsində, Mülki Məcəllədə, Mənzil Məcəlləsində, Şəhərsalma və Tikinti Məcəlləsində, habelə “Bələdiyyə torpaqlarının idarə edilməsi haqqında”, “Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında Əsasnamənin təsdiq edilməsi barədə” və “Daşınmaz əmlakın dövlət reyestri haqqında” qanunlarda dəyişiklik edilməsi barədə qanun layihəsini deputatların diqqətinə çatdırıb.
Vüqar Bayramov “Büdcə sistemi haqqında” Qanunda dəyişiklik edilməsi barədə qanun layihəsi ilə bağlı məlumat verərək, büdcə qanunvericiliyinin təkmilləşdirilməsi məqsədilə bir sıra düzəlişlərin, o cümlədən “uzunmüddətli dövr” ifadəsinin, “dividend” anlayışının əlavə olunması, eləcə də məqsədli büdcə fondlarının ilin sonuna qalan istifadə olunmamış vəsaitinin vahid xəzinə hesabının sərbəst qalığına köçürülməsi ilə bağlı dəyişikliklərin təklif edildiyini bildirib. O, həmçinin “Dövlət borcu haqqında” Qanunda dəyişiklik edilməsi barədə qanun layihəsini də təqdim edib.
Milli Məclisin İnsan hüquqları komitəsinin sədri Zahid Oruc Mülki Məcəllədə, İnzibati Xətalar Məcəlləsində, “Media haqqında” və “Hüquqi şəxslərin dövlət qeydiyyatı və dövlət reyestri haqqında” qanunlarda dəyişiklik edilməsi barədə” qanun layihəsini təqdim edib. Qeyd olunub ki, sənəddə xarici media subyektlərinin filial və nümayəndəliklərinin Azərbaycanda fəaliyyət qaydasının beynəlxalq müqavilələrlə tənzimlənməsi, onların Dövlət Vergi Xidmətində qeydiyyatdan keçdikdən sonra Media Reyestrinə daxil edilməsi üçün müraciət etməsi tələbi öz əksini tapıb. Həmçinin, saxta məlumatların dərci və yayımını qadağan edən norma, eləcə də Media Reyestrində olmadan həyata keçirilən media fəaliyyətinin qanunsuzluğu təsbit edilib.
Adları çəkilən bütün qanun layihələri səsə qoyularaq üçüncü oxunuşda qəbul edilib.
Yeni və Uyğunlaşdırıcı Qanunvericilik Təşəbbüsləri
Milli Məclisin sədri Sahibə Qafarova növbəti iki məsələnin Prezidentin bir məktubu ilə parlamentə daxil olduğunu və mahiyyətcə bir-birinə yaxın olduğunu bildirib.
Hüquq siyasəti və dövlət quruculuğu komitəsinin sədri Əli Hüseynli “Xüsusi icra məmurları haqqında” qanun layihəsi barədə məlumat verib. Növbəti qanun layihəsini – Mülki Prosessual Məcəllədə, Mülki Məcəllədə, Vergi Məcəlləsində, Cinayət-Prosessual Məcəlləsində, Cəzaların İcrası Məcəlləsində, Rəqabət Məcəlləsində, “Sosial sığorta haqqında”, “Polis haqqında”, “Tibbi sığorta haqqında”, “Notariat haqqında”, “İcra məmurları haqqında”, “İcra haqqında”, “Narkotik vasitələrin, psixotrop maddələrin və onların prekursorlarının dövriyyəsi haqqında”, “İnzibati icraat haqqında”, “Ədliyyə orqanlarında qulluq keçmə haqqında”, “Nağdsız hesablaşmalar haqqında” və “Siyasi partiyalar haqqında” qanunlarda dəyişiklik edilməsi barədə layihəni təqdim edən komitə sədri Əli Hüseynli bunun “Xüsusi icra məmurları haqqında” qanun layihəsinə uyğunlaşdırma məqsədilə hazırlandığını qeyd edib. Hər iki qanun layihəsi ayrı-ayrılıqda səsə qoyularaq üçüncü oxunuşda qəbul olunub.
Daha sonra Əli Hüseynli Torpaq Məcəlləsində, Mülki Məcəllədə, Vergi Məcəlləsində, Mənzil Məcəlləsində, “Torpaq islahatı haqqında”, “Torpaq bazarı haqqında”, “Notariat haqqında”, “İcra haqqında”, “Daşınmaz əmlakın dövlət reyestri haqqında” və “İpoteka haqqında” qanunlarda dəyişiklik edilməsi barədə qanun layihəsinin mahiyyətini izah edib. Bu layihə icra sənədinə əsasən satılmalı olan əmlakın, borclunun üzərinə həbs qoyulmuş əmlakının və ipoteka predmetinin satışında kompleks tənzimləməni nəzərdə tutur.
Əli Hüseynli, həmçinin “Azərbaycan Respublikası vətəndaşının şəxsiyyət vəsiqəsi haqqında”, “Yaşayış yeri və olduğu yer üzrə qeydiyyat haqqında” və “Yaşayış yeri və olduğu yer üzrə qeydiyyat haqqında” Azərbaycan Respublikası Qanununun tətbiqi haqqında Əsasnamənin təsdiq edilməsi barədə” qanunlarda dəyişiklik edilməsi haqqında qanun layihəsini təqdim edib. Sənəd Azərbaycan Respublikası vətəndaşının şəxsiyyət vəsiqəsinin Beynəlxalq Mülki Aviasiya Təşkilatının (ICAO) standartlarına uyğunlaşdırılması, habelə vəsiqənin istifadəsi ilə bağlı yaranmış bəzi çətinliklərin aradan qaldırılması məqsədilə hazırlanıb. Təklif olunan dəyişikliklər şəxsiyyət vəsiqəsi ilə bağlı məlumatların daha müasir sistemlərdə, təhlükəsiz və çevik şəkildə idarə olunmasını, sənədləşmə prosedurlarının və xidmətlərin vətəndaş üçün sadələşdirilməsini təmin edəcək. Bu qanun layihələri də üçüncü oxunuşda qəbul edilib.
Sonuncu Müzakirələr və Sessiyanın Yekunu
Milli Məclisin sədri Sahibə Qafarova sonuncu 2 məsələnin uyğunlaşdırma xarakteri daşıdığını və “Normativ hüquqi aktlar haqqında” Konstitusiya Qanununun tələbinə əsasən bir oxunuşda qəbul ediləcəyini bildirib.
İqtisadi siyasət, sənaye və sahibkarlıq komitəsinin sədri Azər Əmiraslanov “Daşınmaz əmlakın dövlət reyestri haqqında” Qanunda dəyişiklik edilməsi barədə qanun layihəsindən bəhs edib. Məsələ ətrafında aparılan müzakirələrdə komitə sədri Zahid Oruc, deputatlar Elçin Mirzəbəyli, Bəhruz Məhərrəmov, Vasif Qafarov çıxış edərək, öz fikir və qeydlərini açıqlayıblar. Parlamentin Aqrar siyasət komitəsinin sədri Tahir Rzayev Torpaq Məcəlləsində və “Balıqçılıq haqqında” Qanunda dəyişiklik edilməsi barədə qanun layihəsinin mahiyyətini nəzərə çatdırıb. Bildirilib ki, layihə qanunvericiliyin normalarının dəqiqləşdirilməsi məqsədilə hazırlanıb. Təbii ehtiyatlar, energetika və ekologiya komitəsinin üzvü Asif Əsgərov məsələ barədə bu komitənin müsbət rəyini diqqətə çatdırıb. Müzakirələrdən sonra qanun layihələri səsə qoyularaq qəbul olunub.
Sessiyanın sonunda deputatlar Sahib Alıyev və Aqil Abbasov çıxış edərək bəzi aktual məsələlər barədə fikirlərini bölüşüblər.
Azərbaycanın Dövlət Himni səsləndirildikdən sonra Milli Məclisin növbədənkənar sessiyası yekunlaşıb.
