Özbəkistan-Azərbaycan Parlamentlərarası Forumu iştirakçıları Xivənin tarixi abidələri ilə tanış olublar
Bakı, 1 iyul
Birinci Özbəkistan-Azərbaycan Parlamentlərarası Forumun iştirakçıları Özbəkistanın qədim Xivə şəhərində yerləşən tarixi-mədəni abidələri ziyarət ediblər.
Parlament sədri Sahibə Qafarova Arda Xivə kompleksində
Nümayəndə heyətlərinin, o cümlədən Azərbaycan Milli Məclisinin sədri Sahibə Qafarova və Özbəkistan Respublikası Ali Məclisi Senatının sədri Tənzilə Narbayevanın iştirak etdiyi səfər çərçivəsində ilk dayaq Arda Xivə kompleksinə olub. Qonaqlara məlumat verilib ki, 25 hektarlıq geniş ərazini əhatə edən bu möhtəşəm kompleks yaşıllıqların bol olduğu Govuk gölünün sahilində salınıb.
Nurullaboy saray kompleksinin memarlıq xüsusiyyətləri
Ziyarət proqramında Nurullaboy saray kompleksi də yer alıb. Bildirilib ki, Xivə xanı II Məhəmməd-Rəhim Bayın sifarişi ilə 1906-1912-ci illərdə tikilən bu kompleks dörd hissədən ibarətdir. Onun tərkibinə mərasim və məhkəmə zalları, yaşayış binaları və mədrəsə də daxil olmaqla, ümumilikdə 100-dən artıq zal və otaq daxildir. Saray kompleksi 650 metrdən çox uzunluğa malik möhkəm istehkam divarı ilə əhatə olunub.
İçan-Qala Muzey-Qoruğuna səfər
Qonaqlar, həmçinin İçan-Qala Dövlət Tarixi Memarlıq Muzeyi ilə tanış olublar. Məlumat verilib ki, 1920-ci ildə əsası qoyulan bu muzey, 1969-cu ildə tarixi İçan-Qala şəhərinin özü ilə birlikdə muzey-qoruq elan edilib. Muzeyin fondunda xan dəftərxanasının sənədləri və saraya aid müxtəlif əşyalar mühüm yer tutur. Ümumi sahəsi 26 hektar olan muzeydəki ekspozisiyalar Özbəkistanın qədim tarixi ilə müasir dövrünü əlaqələndirir. Burada Xivə xanlığının, qədim Xarəzmin tarixinə, etnoqrafiyasına və sənət nümunələrinə dair zəngin kolleksiyaları əks etdirən 14 daimi muzey və sərgilər mövcuddur.
