298 nömrəli məktəbə müvəqqəti təyinatla bağlı suallar
Bu yaxınlarda 298 nömrəli məktəbə müvəqqəti direktor təyin olunması ciddi suallar doğurur. Belə ki, cəmi 2,5 illik direktor müavini təcrübəsi olan Günay Nəzərovaya əsas vəzifəsi (284 nömrəli tam orta məktəbin direktor müavini) saxlanılmaqla, 3 aylıq müddətə bu məktəbin direktor səlahiyyətlərini icra etmək tapşırılıb. Bu təyinat, xüsusilə də məhdud idarəçilik təcrübəsi nəzərə alındıqda, ictimaiyyətdə “nə üçün belə bir qərar verildi?” sualını aktuallaşdırır.
Etik qaydaların pozulması və idarəetmə üslubu
Günay Nəzərovanın 298 nömrəli məktəbdə fəaliyyətə başlaması ilə etik davranış qaydaları ilə bağlı narahatlıqlar yaranıb. Məktəbə gələn kimi həyat yoldaşını direktor kreslosunda otuzduraraq selfi çəkdirməsi və bunu geniş şəkildə paylaşması peşəkar etikaya zidd hərəkət kimi qiymətləndirilir. Təyin olunmasından cəmi bir həftə keçməsinə baxmayaraq, məktəbdə idarəçilik sanki sınaq rejimində qurulub, bu da təhsil müəssisəsini tələbkar bir sınaq meydanına çevirib.
Onun ilk “yenilik”lərindən biri məktəb həyətinə birbaşa avtomobil sürməsi olub. Bu hərəkət, məktəb kollektivinə “mən bura sahib kimi gəlmişəm” mesajını vermək cəhdi kimi qəbul edilib.
Daha sonra müəllimlərin vahid geyim qaydalarını ləğv edərək, “istədiyinizi geyinin” deməsi məktəbdə nizam-intizamın zəifləməsinə gətirib çıxarıb. Nəticədə müəllimlər idman ayaqqabıları, qeyri-rəsmi şalvarlar və dar geyimlərlə dərsə gəlməyə başlayıb, bu da təhsil müəssisəsində ciddi mühitin yaranmasına mane olub.
İş rejimi və şagirdlərlə mübahisələr
Günay Nəzərovanın iş rejimi də narazılıqlara səbəb olur. O, məktəb rəhbərləri üçün müəyyən edilmiş iş saatlarına (08:00-dan 18:00-a qədər) əməl etmir, istədiyi vaxt gəlib-gedir. Bəzən saat 11:00-da gəlib 14:00-da gedir, bəzən isə axşam saat 17:00-da görünür. Bununla yanaşı, işçiləri axşam saat 20:00-a qədər məktəbdə saxlayır, bu da onların iş rejimində gərginlik yaradır.
Direktorun məktəbdə davamlı olmaması səbəbindən müəllimlər şəxsi sənədləşmə işlərini belə yerinə yetirə bilmirlər. Şəffaflıq adı altında hər şeyin Günay Nəzərovanın şəxsi nəzarətində olması kollektivdə stress, gərginlik və qeyri-müəyyənlik mühiti yaradır.
298 nömrəli məktəbin 284 nömrəli məktəbin filialına çevrilməsi də diqqət çəkir. Direktor məktəbdə olduğu zamanlarda, 284 nömrəli məktəbdən gələn müəllimlər güllər, tortlar gətirərək saatlarla bu təhsil müəssisəsində qeyd edir, nəticədə məktəb idarəetmə mərkəzindən daha çox əyləncə məkanını xatırladır.
Dövlət layihələrinə hörmətsizlik və “daxili audit”
Günay Nəzərovanın dövlət layihələrinə qarşı münasibəti də tənqidlərə səbəb olur. Təyin olunduğu həftə ibtidai sinif müəllimlərini şənbə günü məktəbə toplayaraq, Təhsil Nazirliyinin STEAM layihəsini “yararsız və keyfiyyətsiz” adlandırması məsuliyyətsizlik kimi qiymətləndirilir. O, həmçinin proqnoza əsasən təsdiqlənmiş məktəbəhazırlıq qruplarını bağlayacağını və məktəbin 5 günlük iş sisteminə keçəcəyini bildirib.
Direktorun “ərim məktəbə təftişə gələcək” bəyanatı və həyat yoldaşı ilə direktor kreslosunda çəkdirdiyi selfini “daxili audit” adı altında ictimailəşdirməsi peşəkar idarəçilik və etik davranış normalarına zidd hesab edilir.
İkiqat vəzifə və işdə intizamsızlıq
Günay Nəzərovanın hələ də 284 nömrəli məktəbdə direktor müavini kimi qeydiyyatda olması, lakin oradakı vəzifəsini icra etməməsi, eyni zamanda bu təhsil müəssisəsində nizam-intizamdan bəhs etməsi müəmmalı görünür. Təyin olunduqdan sonra heç bir dəfə dərsə gəlməyən direktorun bu cür iddialarla çıxış etməsi, üstəlik 284 nömrəli məktəbin reytinqdə 298 nömrəli məktəbdən geri qalması fonunda, tənqidlərlə qarşılaşır.
Qeyd olunur ki, 284 nömrəli məktəbdə dərs vaxtı TikTok videolarının yayılması adi hal olsa da, əvvəllər 298 nömrəli məktəbdə telefonlardan istifadəyə ciddi nəzarət olunurdu. O, məktəbdə nadir hallarda görünməsi və uşaqlarla etik olmayan şəkildə mübahisə etməsi, hətta 9-cu sinif şagirdi ilə dalaşması onun idarəçilik keyfiyyətini sual altına qoyur. Xatırladaq ki, o, ötən tədris ilində 284 nömrəli məktəbdə şagirdi təhqir etdiyi üçün məhkəməlik olmuşdu.
Maliyyə pozuntuları və kadr özbaşınalığı
Direktorun bəzi müəllimlərə, o cümlədən Azərbaycan dili və ədəbiyyat müəllimi Aytən Qurbanovaya xüsusi imtiyazlar tanıması ciddi narazılıq doğurur. Günay Nəzərovanın gəlişindən sonra Aytən Qurbanova demək olar ki, məktəbə gəlmir, lakin əməkhaqqısı davamlı olaraq ödənilir. Onun dərs vaxtı şagirdləri tədbirlərə aparması və dərslərdə qeydə alınmaması, həmçinin akademiyada işə başlamasına baxmayaraq bu məktəbdə müəllim kimi saxlanılması aşkar maliyyə pozuntusu kimi qiymətləndirilir. Bu cür ədalətsizlik digər müəllimlər arasında narahatlıq yaradır.
İşə gəlməyən, lakin direktordan qeyri-rəsmi icazə alan Mustafayeva Edilya, Rəhimova Fəqanə, Əliyeva Arzu və Qurbanova Aytən kimi müəllimlərin mövcudluğu məktəbdəki nizam-intizam problemlərini dərinləşdirir.
Kadr siyasətində də ciddi özbaşınalıqlar müşahidə olunur. İki işçi işdən çıxma ərizəsi yazdığı halda, iyunun 12-də onların yerinə tələsik şəkildə iki yeni əməkdaş işə götürülüb. Hətta köhnə işçilərə xitam verilmədən əvvəl yenilərin işə alınması qanun pozuntusudur. Yeni işçilərdən biri 284 nömrəli məktəbin direktoru Xalid müəllimin həyat yoldaşı İlahə Alıhüseynovadır. Xadimə ştatına götürülən bu şəxs məktəbə gəlib bir saat direktorun otağında oturub geri qayıdır, bu da idarəçilikdəki nöqsanlardan xəbər verir.
Sənədləşmə prosesində yol verilən səhvlər səbəbindən direktor mühasibatlığa izahat verə bilməyib. Çıxış yolu kimi, həmin işçilərə iyunun 19-da xitam verilib və sonra yenidən işə götürülüblər. Bu hərəkət hüquqi savadsızlığın və qanunvericiliyin ciddi şəkildə pozulmasının göstəricisidir.
Məktəbin gələcəyi ilə bağlı narahatlıqlar
Bütün bu baş verən özbaşınalıqlar 298 nömrəli məktəbə bu direktorun kim tərəfindən və hansı məqsədlə təyin olunduğu sualını ortaya çıxarır. Günay Nəzərova özünü Bakı Şəhər Təhsil İdarəsinin sektor müdiri Turanə Məcidlinin rəfiqəsi, 297 nömrəli məktəbin direktoru Cavid və 284 nömrəli məktəbin direktoru Xalidin məsləhətləşdiyi şəxs kimi təqdim edir.
Vacib əmrləri belə tərtib etməyi bacarmayan, məktəbi telefon vasitəsilə idarə edən, müəssisədə əsasən tort kəsməklə və şəkil çəkdirməklə məşğul olan bu direktorun fəaliyyəti 298 nömrəli məktəbdə nizam-intizamın tamamilə pozulmasına gətirib çıxarmaqdan başqa bir nəticə verməyəcəkmiş kimi görünür.
