Medianın İnkişafında Ümummilli Liderin Davamlı İrəliləyişləri
Bakı, 8 iyul. Ulu Öndər Heydər Əliyevin təməlini qoyduğu mükəmməl media prinsipləri bu gün də dövlətin informasiya siyasətinin mərkəzində dayanaraq aktuallığını qoruyub saxlayır. Azərbaycan müstəqilliyini bərpa etdikdən sonra ölkədə söz azadlığının və məlumat yayımının təmin edilməsi, demokratik, azad mətbuatın formalaşması, onun hüquqi-normativ bazasının qurulması və iqtisadi müstəqilliyinin təminatı üçün geniş imkanlar yaranıb.
Medianın İnkişafı Agentliyinin (MEDİA) İcraçı direktoru Əhməd İsmayılovun 8 iyul tarixində keçirilən “Medianın inkişafında Ümummilli Lider Heydər Əliyevin rolu” adlı konfransda qeyd etdiyi kimi, 1993-cü ildə ümumxalq tələbi ilə yenidən hakimiyyətə qayıdan Ümummilli Liderin siyasi iradəsi və böyük səyləri sayəsində plüralizmi və söz azadlığını məhdudlaşdıran maneələr aradan qaldırılıb.
O, Azərbaycan Prezidentinin 1998-ci il 6 avqust tarixli Fərmanını xüsusi qeyd edib. Bu Fərmanla Nazirlər Kabineti nəzdində mətbuatda və digər kütləvi informasiya vasitələrində dövlət sirlərini mühafizə edən baş idarə ləğv edilmiş, bununla da mətbuata tətbiq edilən senzura aradan qaldırılmış və milli mətbuatın inkişafı yolunda yeni perspektivlər açılmışdır.
Ə. İsmayılov vurğulayıb ki, medianın, o cümlədən söz azadlığının fəaliyyətini tənzimləyən qanunvericilik bazasının təkmilləşdirilərək beynəlxalq standartlara uyğunlaşdırılması, Azərbaycanda demokratik mətbuatın formalaşması və sürətli inkişafının təmin edilməsi məhz Ümummilli Lider Heydər Əliyevin adı ilə birbaşa bağlıdır.
