Abşeron rayonu ərazisində qanunsuzluqlar: Sakinlərin hüquqları pozulur
Abşeron rayonu ərazisində yerləşən, hələ də istismara verilməmiş çoxmərtəbəli yaşayış binasında davam edən tikinti prosesi və sakinlərlə rəftar qanunvericiliyin tələblərinə və vətəndaş hüquqlarına açıq-aşkar ziddir. Sakinlərdən daxil olan çoxsaylı şikayətlər əsasında aparılan araşdırmalar bir sıra ciddi pozuntuları üzə çıxarıb. Bütün bu proseslərin mərkəzində isə Cavadzadə qardaşları dayanır.
Qanunsuz sayğac ödənişləri və maliyyə fırıldağı iddiaları
Sakinlərin bildirdiyinə görə, qaz, su və işıq sayğaclarının quraşdırılması adı altında onlardan 1700-2500 manat məbləğində ödəniş tələb olunur. Cavadzadə qardaşları bu məbləğlərin aidiyyəti dövlət qurumlarına ödənildiyini iddia etsələr də, bunu təsdiq edən heç bir rəsmi sənəd təqdim edilmir. Bu pulların kimlərin cibinə getdiyi isə cavabsız sual olaraq qalır.
Tikintidə təhlükəsizlik normalarına etinasızlıq
Tikintinin aparıldığı binada fövqəladə vəziyyətlər üçün nəzərdə tutulmuş çıxışların olmaması, habelə yanğın zamanı istifadə oluna biləcək nərdivan və digər təhlükəsizlik sistemlərinin quraşdırılmaması ciddi narahatlıq doğurur. Liftlərin istifadəsi ilə bağlı da məhdudiyyətlər mövcuddur. Belə bir şəraitdə Fövqəladə Hallar Nazirliyi, Şəhərsalma və Arxitektura Komitəsi kimi qurumların susqunluğu anlaşılmazdır. Bu, ya məsuliyyətsizlikdən, ya da müəyyən dairələrin təsirindən irəli gəlir.
Tullantı daşınmasından qazanc əldə edilməsi
Binanın təmir prosesi zamanı yaranan tullantılar bina qarşısına yığılır və onların daşınması sakinlərin hesabına həyata keçirilir. Tullantıların hər daşınması üçün 70-100 manat məbləğində ödəniş tələb olunur və bu proses rəsmi deyil, şəxsi avtomobillərlə aparılır. Bu, qanunsuz gəlir mənbəyinə çevrilmiş bir mexanizmdir.
Vergidən yayınma halları
Mənzillər Cavadzadə qardaşlarının adlarına keçirilərək kreditsiz satılır. Bu satışlar zamanı əlavə dəyər vergisi (ƏDV) təqdim edilmir, dövlətə ödənməli olan vergilər isə gizlədilir. Vergidən yayınma bu şəkildə açıq formada həyata keçirilsə də, hələ də hüquqi tədbir görülməyib.
Yaşayış olmadan kommunal ödəniş tələbi
Binada yaşayış başlamamış olsa da, sakinlərdən kvadratmetrə görə aylıq 0.60 qəpik məbləğində kommunal haqq tələb olunur. Heç bir xidmət göstərilmədiyi halda belə bir ödənişin tələb edilməsi həm hüquqi, həm də əxlaqi baxımdan qəbuledilməzdir.
Lift xidmətlərindən qanunsuz gəlir əldə edilməsi
Liftlərin istifadəsi belə qazanc mənbəyi kimi dəyərləndirilir. Sakinlər təmir materiallarını mənzillərinə qaldırmaq üçün 500 manat ödəməyə məcbur edilir. Gələcəkdə isə liftin yenilənməsi üçün 40 min manat tələb olunacağı bildirilir. Bu isə yeni bir pul yığımının əsasının qoyulmasıdır.
Dövlət orqanlarının xəbərdarlıqlarına məhəl qoyulmaması
Məlumatlara əsasən, Abşeron rayonu İcra Hakimiyyəti tərəfindən Cavadzadə qardaşlarına dəfələrlə xəbərdarlıq və tövsiyələr verilsə də, heç bir tədbir görülməyib. Dövlət orqanlarının bu qədər aciz və təsirsiz mövqe tutması ictimaiyyət üçün ciddi suallar doğurur.
Media mənsublarına qarşı etinasızlıq
Məsələ ilə bağlı binanın rəhbərliyindən izahat almaq cəhdləri də nəticəsiz qalıb. Özünü “komendant” kimi təqdim edən şəxs “müdir yoxdur, nömrənizi qoyun, əlaqə saxlanılacaq” deyərək media nümayəndəsini yola salmışdı. Lakin aylar keçməsinə baxmayaraq, heç bir cavab verilməyib və problemlərdə dəyişiklik müşahidə olunmayıb.
Aidiyyəti qurumlara çağırış edirik: Bu tikintidə baş verən qanunsuzluqlar, insan hüquqlarının pozulması və vergi qaçaqmalçılığı faktları dərhal araşdırılmalı, Cavadzadə qardaşları barəsində hüquqi qiymət verilməlidir. Şəhərsalma və Arxitektura Komitəsi, Fövqəladə Hallar Nazirliyi və İqtisadiyyat Nazirliyi bu məsələni nəhayət ciddi nəzarətə götürməlidir. Əks halda, bu cür cəzasızlıq gələcəkdə daha böyük fəlakətlərin başlanğıcı ola bilər. Sakinlər təhlükəsizlik, şəffaflıq və hüquq tələb edir – və bu tələblər artıq ertələnməməlidir.
