“Super İnşaat” MTK-nın Rəhbəri Haqqında Şok İddialar
Bakıda fəaliyyət göstərən “Super İnşaat” MTK-nın rəhbəri Azad Nağıyev barəsində ciddi maliyyə maxinasiyaları ilə bağlı araşdırma aparılıb. Aldığımız məlumatlara görə, banklardan böyük məbləğlərdə kredit götürülərək girov qoyulan əmlakların saxta sənədlərlə satılması və mülkiyyət hüququnun qanunsuz yollarla digər şəxslərə ötürülməsi nəticəsində bir sıra vətəndaşlar külli miqdarda maddi və hüquqi zərərə məruz qalıblar. Zərərçəkənlər arasında bank filial müdirlərinin də olduğu bildirilir.
Qeyri-Qanuni Satışlar Və Sənəd Saxtakarlığı
İddialara əsasən, Azad Nağıyev hətta yaxın dostu adlandırdığı şəxsin əmlakını belə, onun razılığı olmadan başqa birinə satmağa cəhd edib. Bu vəziyyətlə razılaşmayan dostu hüquq-mühafizə orqanlarına müraciət edib. Araşdırmalar zamanı ortaya çıxan yeni bir fakt isə ikinci zərərçəkmiş şəxs Rasim Kərimovla bağlıdır. İddiaya görə, Rasim Kərimov saxta sənədlərlə 850 kvadratmetrlik obyektə sahib olub.
Həmin əmlak 2014-cü ildə Rasim Kərimova 4 milyon 500 min manata satılsa da, obyektin bankda girovda olması rəsmi çıxarışın alınmasına ciddi maneələr yaradıb. Məlum olub ki, əmlak Rasim Kərimova satılmadan xeyli əvvəl 5 milyon manat qarşılığında “Premiumbank” və “Dekabank”larda girovda olub. Bu səbəbdən Rasim Kərimov Azad Nağıyevlə razılaşaraq, əmlak sahibinin xəbəri olmadan sənədlərdə saxtakarlıq edib. Onlar 2014-cü ildə mülkiyyət sahibi ilə bağlanmış müqaviləni pozaraq, geri tarixə – 2010-cu ilə müqavilə bağlayıb və əmlakın Rasim Kərimova satıldığını göstəriblər. Bu yolla əmlakın bankın girovuna qoyulmasının qanunsuz olduğu və ya dolayı yollarla bankda olan əmlakın özəlləşdirilməsinə cəhd edildiyi iddia olunur. Banklar hüquqi tədbirlər görərək bu cəhdə mane olublar və məhz bu məqamda saxta sənədlər, yəni, müqavilələr üzə çıxıb.
Rasim Kərimovun əldə etdiyi 850 kvadratmetrlik obyekt faktiki olaraq həmin vaxt bankda girovda olub. Rasim Kərimovun obyektin bankda girov olmasından xəbərdar olduğu halda 4 milyon 500 min manatı ona verməsi, onun sonradan müqavilələrdə edilən dəyişikliklərdə əlbir olduğuna dəlalət edir. Həmin şəxs və Rasim Kərimov obyektə dair daxili müqavilə əsasında 2010-cu ilə aid kimi sənədlərdə dəyişikliklər ediblər. Rəsmi sənədlərin olmaması və alqı-satqının qeyri-rəsmi formada həyata keçirilməsi ona qanunsuz gəlir əldə etməkdə geniş imkanlar yaradıb.
Qalmaqallı Borclar Və Gizli Şəriklər
“Super İnşaat” MTK-nın adı müxtəlif mənzillərin və obyektlərin eyni vaxtda bir neçə şəxsə satılması ilə bağlı qalmaqallarda da hallanır. Şirkət bu yollarla böyük gəlirlər əldə etsə də, nəticədə bank borclarını ödəyə bilməyib və həmin əmlakların bir hissəsi bank tərəfindən müsadirə olunub.
Əldə etdiyimiz məlumata görə, “Super İnşaat” MMC-nin tək sahibi kimi tanınan Nağıyev əslində tək fəaliyyət göstərməyib. Hazırda həbsdə olan Nağıyevin əsas şəriklərindən biri – keçmiş Mərkəzi Bank sədri Elman Rüstəmov olub. Rüstəmovun dəstəyi ilə cəmi 10 manat nizamnamə kapitalı olan “Super İnşaat” MMC-yə milyonlarla manatlıq kreditlər ayrılıb və bu vəsaitlərin bir qismi tikilən mənzillərlə ödənilib. Lakin şirkət qeyri-şəffaf maliyyə idarəçiliyi səbəbindən çətin vəziyyətə düşüb. Nağıyev yaranmış borcları ört-basdır etmək üçün əmlakları bir neçə şəxsə satmaqda çarə görüb. Məhkəmə istintaqı zamanı Azad Nağıyev şirkətdəki yeyintilərin özünün deyil, Elman Rüstəmovun mənimsəməsini iddia etmişdir. Lakin Elman Rüstəmov məhkəmə iclasına ifadə vermək üçün gətirilə bilməyib. Bu da postunu itirmiş şəxslərin belə məhkəmə hakimindən üstün olduğunun nümunəvi göstəricisidir.
Qeyd etmək lazımdır ki, şirkətin digər şəriklərindən birinin hazırda vəzifədə olan rayon icra başçısı olduğu da iddia edilir. Həmin şəxsin adı torpaq və tikinti sahəsində müxtəlif maxinasiyalarda hallanır və bu istiqamətdə araşdırmalarımız davam edir.
Ən ciddi məsələlərdən biri isə Elmlər Akademiyası ərazisində inşa edilmiş və “AQANA” MMC-nin adını daşıyan binada 850 kvadratmetr sahəyə malik əmlakın girovda olduğu halda Rasim Kərimova satılmasıdır. Məhz Elman Rüstəmovun ən böyük şəriklik payı da “AQANA” MMC-də olub. Bu faktlar onun rəhbərlik etdiyi şirkətin və onun ətrafındakı şəxslərin qanunsuz yollarla gəlir əldə etdiyini ortaya qoyur.
Azadlığa Çıxmaq Cəhdləri Və Həbsxana Şəraiti
Aldatma yolu ilə insanların əmlakını bir neçə şəxsə satan və banklara külli miqdarda borcu olan bu şəxsin azadlığa çıxmaq üçün Prezidentin imzası ilə verilən Əfv sərəncamına daxil olmaq məqsədilə 50 min manat rüşvət verdiyi iddia edilir. Əfv sərəncamının prezidentin iradəsi ilə baş tutduğunu nəzərə almayan Nağıyevin bu məqsədlə Azər İsrafilova rüşvət verdiyi bildirilir. Lakin istədiyi nəticəni əldə etmədiyindən, dörd gün sonra Korrupsiyaya Qarşı Mübarizə Baş İdarəsinə müraciət edərək Azər İsrafilovun həbsi ilə nəticələnən prosesə səbəb olub.
Hazırda “Super İnşaat” MMC-nin direktoru kimi tanınan Azad Nağıyevin həbs həyatı yaşadığı cəzaçəkmə müəssisəsində şəraitinin digər məhkumlardan daha yaxşı qurulması, hələ də qoruyucu şəxslərinin olmasından xəbər verir. Lakin ona qarşı irəli sürülən iddialar bununla bitmir. Nağıyev və onun şəbəkəsinin araşdırmalarımızda ifşa edilməsinə çox az qalıb. Bu məsələ ilə bağlı geniş araşdırmamızı davam etdiririk və yaxın günlərdə yeni faktlarla ictimaiyyəti məlumatlandıracağıq.
Korrupsiya mövzusu ətrafında davam edən araşdırmalar cəmiyyətdə böyük maraq doğurur.
