Müəmmalı Bəraət: Binəqədi Məhkəməsinin Qərarı Suallar Doğurur
Bakı Apellyasiya Məhkəməsinin hakimi İ. İbrahimlinin də ekspert rəylərini nəzərə almadığı, ictimaiyyətin diqqət mərkəzində olan bir cinayət işinə 23 aprel 2025-ci il tarixində Ali Məhkəmənin Cinayət Kollegiyasında baxılacaq. İşin mahiyyəti faciəvi yol qəzası nəticəsində həyatını itirən Maksut Ziyəddin oğlu Ramazanovun ölümü ilə bağlıdır. Hadisə 2023-cü il fevralın 12-də Bakı-Xocasən yolunun Binəqədi rayonu ərazisindən keçən ikinci kilometrliyində baş vermişdir. Həmin vaxt 1971-ci il təvəllüdlü Maksut Ramazanov idarəetməsində etibarnaməsi olmayan “QAZ-33021” markalı, 64-BB-498 dövlət qeydiyyat nişanlı yük avtomobili ilə hərəkət edən Kamran Nəsibovun idarə etdiyi nəqliyyat vasitəsinin altında qalaraq faciəli şəkildə həlak olmuşdur. Hadisə ilə bağlı Azərbaycan Respublikasının Cinayət Məcəlləsinin 263.2-ci maddəsi ilə təqsirləndirilən Kamran Nəsibov barəsində cinayət işi başlanmışdır.
Binəqədi rayon Məhkəməsinin hakimi Aynurə Sadıqovanın icraatında olan iş 1 il 1 ay davam etdikdən sonra, 31 may 2024-cü il tarixində sensasiyalı şəkildə başa çatdı. Hakim Sadıqova təqsirləndirilən Kamran Nəsibova bəraət hökmü çıxardı, ona qarşı irəli sürülən mülki iddia da rədd edildi. Bu qərar, mərhumun hüquqi varisi Qoşqar Ramazanov tərəfindən Azərbaycan Respublikasının Prezidenti İlham Əliyevə ünvanlanmış müraciətə səbəb olmuşdur. Müraciətdə məhkəmə prosesində yol verilən qanun pozuntularından və qərəzli yanaşmalardan bəhs edilir.
Apellyasiya Məhkəməsi Birinci İnstansiyanın Qərarını Dəyişmədi
Dövlət ittihamçısı Nəzər Fərzəliyev və zərərçəkmiş tərəfin hüquqi varisi Qoşqar Ramazanov Binəqədi rayon Məhkəməsinin qərarından Bakı Apellyasiya Məhkəməsinə müraciət etsələr də, 14 oktyabr 2024-cü il tarixində hakim İbrahim İbrahimlinin sədrliyi ilə keçirilən məhkəmə iclasında birinci instansiya məhkəməsinin bəraət hökmü dəyişdirilmədən qüvvədə saxlanılmışdır. Bu qərar işə ədalətli yanaşma və mötəbər sübutların qiymətləndirilməsi baxımından ciddi şübhələr yaratmışdır.
Hakim Aynurə Sadıqovanın Fəaliyyəti Şübhə Altına Alınır
Mərhumun hüquqi varisi Qoşqar Ramazanovun müraciətində qeyd olunur ki, məhkəmə prosesi kifayət qədər təcrübəsi olmayan hakim Aynurə Sadıqovanın “ekspertiza oyunu” ilə 1 ildən çox davam etmişdir. Bildirilir ki, hakim Sadıqova zərərçəkmiş tərəfin vəsatətlərini qəbul etmədiyi halda, qarşı tərəfin bütün əsaslı və əsassız vəsatətlərini təmin etmiş, işin qəsdən uzadılmasında maraqlı olmuşdur. Bütün faktlar və ekspert rəyləri ortada olsa da, üç dəfə təkrar yol-nəqliyyat ekspertizaları keçirmək barədə qərar qəbul edilmişdir. Bu hallar hakimin bitərəfliyinə ciddi şübhələr yaratdığı üçün Qoşqar Ramazanov Binəqədi rayon Məhkəməsinin sədri Araz Kazımova və Məhkəmə-Hüquq Şurasının sədrinə dəfələrlə müraciət edərək hakim Sadıqovanın prosesdən uzaqlaşdırılmasını xahiş etmiş, lakin heç bir tədbir görülməmişdir.
Prokurorluq və Ekspert Rəyləri Ziddiyyətləri Açıqlayır
Məhkəmə istintaqı zamanı Kamran Nəsibovun təqsirli olmasına dair mötəbər dəlillər və kifayət qədər sübutlar olmasına baxmayaraq, hər iki instansiya məhkəməsinin səhv nəticəyə gəlməsi və əsassız bəraət hökmü çıxarması narahatlıq doğurur. Azərbaycan Respublikası Baş Prokurorluğunun Dövlət İttihamının Müdafiəsi üzrə İdarəsinin Apellyasiya İnstansiyası Məhkəmələrində dövlət ittihamının müdafiəsi üzrə şöbəsinin böyük prokuroru, ədliyyə müşaviri Emil Mirzəyev də kassasiya protestində hər iki instansiya məhkəməsinin qərarının qeyri-obyektiv olduğunu və müdafiə tərəfinin əsassız dəlillərinə üstünlük verildiyini vurğulamışdır. Ədliyyə Nazirliyi Məhkəmə Ekspertizası Mərkəzi tərəfindən aparılan dörd ekspertizanın hamısında Kamran Nəsibovun hərəkətlərində “Yol hərəkəti haqqında” Azərbaycan Respublikası Qanununun 50-ci maddəsinin 1-ci hissəsinin tələblərinə uyğunsuzluq olduğu və onun hadisənin qarşısını almağa texniki imkanının olduğu təsdiq edilmişdir. Qeyd etmək lazımdır ki, Kamran Nəsibovun nəqliyyat vasitəsini idarə etmək hüququ əvvəllər 3 il 6 ay müddətinə məhdudlaşdırılmışdır ki, bu da məhkəmələrin diqqətindən kənarda qalmışdır.
Ümid Ali Məhkəmənin Ədalətli Qərarındadır
Dövlət prokuroru Emil Mirzəyev Bakı Apellyasiya Məhkəməsinin qərarından Azərbaycan Respublikası Ali Məhkəməsinin Cinayət Kollegiyasına kassasiya protesti vermişdir. Zərərçəkmiş tərəfin hüquqi varisi də kassasiya şikayəti ilə Ali Məhkəməyə müraciət etmişdir. Məhkəmə işinin hakim Nazim Mövsümovun sədrliyi ilə baxış iclası 23 aprel 2025-ci il tarixinə təyin edilmişdir. Lakin iki ildən çoxdur ki, qardaşının ölümünə səbəb olan şəxsin qanun qarşısında cavab verməsinə nail ola bilməyən Qoşqar Ramazanov, Ali Məhkəmənin ədalətli qərar çıxaracağına inamının azaldığını bildirərək, Azərbaycan Respublikasının Prezidenti İlham Əliyevə müraciət edərək, Ali Hakimiyyətin müvafiq qurumları vasitəsilə son instansiyada ədalətli ədli mühakimənin təmin olunmasına köməklik göstərilməsini xahiş etmişdir.
