ATƏT PA Sessiyasında Azərbaycan Nümayəndə Heyətinin Fəal İştirakı
Milli Məclisin deputatı Qaya Məmmədovun rəhbərliyi ilə Azərbaycan nümayəndə heyəti iyunun 28-dən iyulun 3-dək Portuqaliyanın Porto şəhərində keçirilmiş Avropada Təhlükəsizlik və Əməkdaşlıq Təşkilatının Parlament Assambleyasının (ATƏT PA) illik sessiyasında uğurla iştirak edib. Heyətə Milli Məclisin deputatları Azay Quliyev, Sevinc Fətəliyeva və Tural Gəncəliyev daxil olublar. Nümayəndə heyətini ATƏT yanında daimi nümayəndəsi Rövşən Sadıqbəyli və Portuqaliyadakı səfir İlqar Muxtarov da müşayiət ediblər. Sessiyada diplomatiya və təhlükəsizlik məsələlərinə dair geniş müzakirələr aparılıb, ATƏT PA prezidenti, vitse-prezidenti və digər vəzifələrə seçkilər keçirilib.
Azərbaycanın Konstruktiv Töhfələri və Uğurları
Nümayəndə heyətinin üzvləri Assambleyanın plenar iclaslarında və komitə toplantılarında fəal iştirak edərək çıxışlarında ölkəmizin regionda sülh və əməkdaşlığın təmin edilməsi istiqamətindəki səyləri barədə ətraflı məlumat veriblər. Eyni zamanda, ətraf mühitin mühafizəsi sahəsində beynəlxalq əməkdaşlıq, o cümlədən COP29-da Azərbaycan rəhbərliyinin səyləri nəticəsində əldə edilmiş tarixi qərarlar və hazırda COP29-un sədri kimi Azərbaycan tərəfinin həyata keçirdiyi fəaliyyətlər xüsusi vurğulanıb. Ümumavropa təhlükəsizliyi məsələləri ətrafında da mövqelər ifadə edilib. Milli Məclisin deputatları münaqişənin Azərbaycana vurduğu ziyanı və mina probleminin ciddiliyini Assambleyanın diqqətinə çatdırıb, Ermənistandan zorla çıxarılmış azərbaycanlıların qayıdış hüququnun təmin edilməsinin vacibliyini qeyd ediblər. Nümayəndə heyətinin rəhbəri Qaya Məmmədovun təklifi ilə Parlament Assambleyası beynəlxalq ictimaiyyəti Azərbaycana işğaldan azad edilmiş ərazilərdə minatəmizləmə, yenidənqurma və bərpa işlərində yardım göstərməyə çağıran mühüm qərar qəbul edib. Nümayəndə heyətinin üzvü, Milli Məclisin deputatı Azay Quliyev isə yenidən ATƏT PA İqtisadi məsələlər, elm, texnologiya və ətraf mühit komitəsinin sədri vəzifəsinə seçilib.
Ermənistanın Əsassız Düzəlişlərinin Rədd Edilməsi
Sessiya zamanı Ermənistan nümayəndə heyəti Assambleyanın yekun sənədinin layihəsinə Azərbaycan əleyhinə yönəlmiş əsassız düzəlişlər təqdim etmişdi. Bu düzəlişlər hazırda məhkəməsi davam edən erməni millətinə mənsub şəxslərin qeyd-şərtsiz azadlığa buraxılması, Azərbaycanda erməni irsinin iddia olunan dağıdılması kimi iddiaları əhatə edirdi. Lakin Azərbaycan nümayəndə heyətinin apardığı səmərəli işlər nəticəsində bu düzəlişlər Assambleya tərəfindən səsvermədə rədd edilib.
Diplomatik Görüşlər və Beynəlxalq Təqdir
Nümayəndə heyətinin rəhbəri və üzvləri ATƏT PA-nın yeni seçilmiş prezidenti Pere Joan Pons, vitse-prezidentləri və digər ölkələrin nümayəndə heyətləri ilə çoxsaylı görüşlər keçiriblər. Avropa təhlükəsizliyi sahəsində ən mühüm beynəlxalq dialoq platformalarından olan Assambleyanın Porto sessiyasında aparılmış müzakirələr Azərbaycan Respublikasının Prezidenti İlham Əliyevin müstəqil, qətiyyətli və prinsipial siyasətinin, bunun sayəsində regionda yaranmış davamlı sülh və inkişaf perspektivlərinin beynəlxalq ictimaiyyət tərəfindən qəbul və təqdir edildiyini bir daha nümayiş etdirib.
