Araz Musayevin Bıçaqlanması: İstintaq Davam Edir, Susqunluq Sual Doğurur
Türkiyənin Antalya şəhərində keçirilən dünya çempionatı zamanı bıçaqlanan Azərbaycan Muay Tay Federasiyasının (AMTF) prezidenti Araz Musayevə qarşı törədilmiş cinayət işi üzrə istintaq davam edir. Mayın 28-də baş vermiş hadisə ilə əlaqədar bir qrup şəxs saxlanılaraq, istintaqa cəlb olunub. Hadisədən təxminən bir ay ötməsinə baxmayaraq, tərəflər arasında yaranmış qəribə susqunluq suallar doğurur.
Hadisənin Cinayət İşinə Çevrilməsi Və İlkin İddialar
Hadisədən qısa müddət sonra ictimaiyyətə açıqlama yayan Araz Musayev, bu cinayətin sifarişçisi olaraq Suraxanı rayon icra başçısı Adil Əliyevi ittiham etmişdi. O, hadisənin məhz Adil Əliyev tərəfindən sifariş verildiyini iddia etmişdi. İcra başçısı isə bu ittihamlara dərhal reaksiya verərək iddiaları təkzib etmişdi. Lakin sonradan ortalıqdakı bu mübahisə səngiyib, nə Araz Musayev danışıb, nə də ittihamların davamı gəlib. Zərərçəkmiş idmançının bu qəribə susqunluğu, cinayət işinin gedişatı ilə bağlı müxtəlif ehtimalların yaranmasına səbəb olur.
İstintaq Prosesi Və Rəsmi Şəxsin Sorğu-Sual Olunması
Hazırda istintaq davam etsə də, Araz Musayevin səsləndirdiyi iddialar əsasında icra başçısının istintaqda sorğu-sual olunub-olunmadığı hələlik bəlli deyil. Əslində, belə hadisələrlə bağlı adı çəkilən bütün tərəflərin dindirilməsi adi hüquqi prosedurdur. O baxımdan, Adil Əliyevin də Araz Musayevin ittihamları əsasında dindirilməsi istisna edilmir. Çünki söhbət ağır ittihamdan, yəni dövlət məmurunun, vəzifəli şəxsin bir idmançıya qarşı sui-qəsd təşkil etməsi barədə irəli sürülən iddialardan gedir. Lakin hələlik bu məsələdə də bir sükut hökm sürür.
Araz Musayevin Səsləndirdiyi Əsaslandırmalar
Araz Musayev iddia edir ki, bıçaqlanma əmri məhz icra başçısından gəlib. O, hadisəni belə izah edir: “Azərbaycan Kikboksinq Federasiyasını (AKF) Adil Əliyev idarə edir. 7-8 ay əvvəl AKF Gənclər və İdman Nazirliyinə məktubla müraciət edərək, AMTF-yə iddiasını ortaya qoymuşdu. Bu məqsədlə məni görüşə çağırmışdılar. Onlar mənə belə bir istəyin olduğunu bildirəndə mən “AMTF ictimai birlikdir, rəhbərliyi 4-5 ildə bir dəfə keçirilən seçki yolu ilə müəyyənləşir” formasında etiraz etdim. Adil Əliyevə “siz necə deputat seçilmisinizsə, burada da o formada seçkilər olur”, – dedim. O isə deputatlıqla bunu eyniləşdirməməyimi bildirərək “Muay-tay bizim olacaq və bu məsələ də bitəcək” cavabını verdi. Bu söhbət zamanı orada 5-10 nəfər adam var idi. Ondan sonra da belə mübahisələr davam etdi. Falçı deyiləm ki, qabaqcadan məni vuracaqlarına dair məlumat verim. Türkiyəyə yollanmamışdan öncə ölkə rəhbərliyinə və hüquq-mühafizə orqanlarımıza, bir sözlə, hər yerə məlumat vermişdim. Çünki məndə müəyyən məlumatlar var idi. Məni vuranların heç birini tanımıram. O adamları saxlayıblar, içəridədirlər. Adil Əliyevin mənimlə bağlı yazışmaları, səs yazısı, sözatması var. O deyilsə, niyə adı bu olayda çəkilsin ki?! Özü də deyir ki, belə söz-söhbətlərdə niyə adım hallanır?” Araz Musayev əlavə edib ki, bu, mütəşəkkil cinayətdir: “Əks halda, AKF-in vitse-prezidenti Elşən Abdulrəhmanovun, Azərbaycan Uşu Sanda Federasiyasının prezidenti Azər Həsənsoyun burada nə işi vardı?”
Adil Əliyevin Mövqeyi Və İttihamların Rədd Edilməsi
Bu ittihamlardan sonra Suraxanı İcra Hakimiyyətinin başçısı Adil Əliyev məsələyə münasibət bildirib. O qeyd edib ki, Bakıda oturub öz işi ilə məşğuldur və bu kimi hadisələrdə indiyə qədər heç zaman adı hallanmayıb, hallana da bilməz: “Çünki bizim daim bir məqsədimiz olub, o da dövlətimizə, xalqımıza xidmətdir. Araz Musayevin nə düşündüyünü, nə üçün belə böhtan atdığını bilmirəm. Ancaq bildiyim odur ki, bu, iyrənc yalandır. Əlbəttə ki, məni tanıyan kimsə bu yalana inanmır”. Adil Əliyev vurğulayıb: “Çünki hələ istintaqın nəticələri bəlli deyil. Belə olan halda Araz Musayev tələm-tələsik niyə mənim adımı hallandırır? Deməli ortada istintaqı yayındırmaq cəhdi var. İstintaq hər şeyi ortaya qoyacaq. Nəticəni gözləmək lazımdır”.
Hadisə ilə bağlı adı keçən tərəflərin mövqeyini işıqlandırmağa hər zaman hazırıq.
