Bakıda “Formula 1 filmi”nin Qapalı Nümayişi
“Dəniz Mall” ticarət mərkəzində yerləşən CineMastercard premium kinoteatrında “Formula 1” idman dramının xüsusi baxışı təşkil edilib. Azərbaycan Respublikasındakı Formula 1 yarışlarının təşkilatçısı Bakı Şəhər Halqası Əməliyyat Şirkətinin dəstəyi ilə keçirilən bu tədbir tamaşaçılar tərəfindən böyük maraqla qarşılanıb.
Filmin Yaradıcı Heyəti və İştirakçıları
“Formula 1 filmi”nin rejissoru “Top Gun: Maverick” və “Cəsur İş” kimi uğurlu işləri ilə tanınan Cozef Kosinskidir. Baş rolları Hollivudun tanınmış aktyorları Bred Pitt, Demson İdris və Xavyer Bardem canlandırıblar. Ekran əsərində hazırda Formula 1 yarışlarında iştirak edən pilotlar da yer alıblar. Layihənin prodüserlərindən biri yeddiqat dünya çempionu Lyuis Hemiltondur.
Çəkiliş Prosesi və Texniki Xüsusiyyətlər
Çəkilişlərə 2023-cü ildə start verilib və real yarış yollarında aparılıb. Bu film üçün xüsusi avtomobillər hazırlanıb. Onlara kamera, qeydiyyat qurğuları, akkumulyatorlar və ötürücülər də daxil olmaqla on beş dayaqlı sistem quraşdırılıb. Uydurma APXGP komandası öz təmir-baxım zonası və komanda körpüsü ilə təmin olunub. Film üçün hazırlanmış yarış avtomobilləri isə yarışlardan əvvəl start düzülüşünün son hissəsində yer alıb. Üç ay ərzində yürüşlərə hazırlaşan aktyorlar Formula 1 avtomobillərinin sükanı arxasına keçiblər.
Süjet Xətti: İki Nəslin Hekayəsi
Filmin süjeti APXGP komandası ətrafında qurulub. Ağır qəzadan sonra avtomobil idmanından uzaqlaşmış əfsanəvi pilot Sonni Heys (Bred Pittin ifasında) yenidən yarış yollarına qayıdır. Məqsədi isə komandanın ikinci pilotu və gənc, istedadlı pilot Coşua Pirsin (Demson İdrisin ifasında) bələdçisi olmaqdır.
Qonaqlar və Baxış İmkanları
Qapalı nümayişdə tanınmış simalar, ictimaiyyət nümayəndələri, jurnalistlər, bloqerlər, iş adamları və böyük təşkilatların rəhbər heyəti, eləcə də Bakı Şəhər Halqası Əməliyyat Şirkətinin qonaqları iştirak ediblər. Gecə “Formula 1 filmi”nin birgə izlənməsi ilə sona çatıb.
Tamaşaçılar ilin ən çox gözlənilən ekran əsərini CineMastercard kinoteatrlar şəbəkəsində üç dildə – rus, ingilis və türk dillərində izləyə biləcəklər. Həmçinin CineMastercard kinoteatrı “Formula 1 filmi”ni ən son texnologiyalar olan 4DX və ScreenX formatlarında izləmək imkanı təqdim edir.
