Rusiyanın Köhnəlmiş İmperiya Düşüncəsi
Buxarest, 29 iyun. Rumıniyanın tanınmış siyasi şərhçisi və beynəlxalq münasibətlər üzrə ekspert xanım Teodora Marin açıqlamasında bildirib ki, Rusiyanın digər xalqlara, xüsusilə də keçmiş sovet məkanında yaşayan millətlərə qarşı davranışları köhnəlmiş imperiya düşüncəsinə əsaslanır.
Beynəlxalq Hüququn Pozulması Və Leninqrad Doktrinası
T. Marin qeyd edib ki, bu dövlət beynəlxalq hüququ və insan haqlarını açıq şəkildə pozaraq öz hegemon niyyətlərini diktə etməyə çalışır və bununla da XXI əsrin reallıqlarını görməzlikdən gəlir. O, Rusiyanın bu gün də ötən əsrin “Leninqrad doktrinası” ilə hərəkət etdiyini, davranışlarının hüquqa yox, güc tətbiqinə, qarşı tərəfi susdurmağa və etnik qruplara qarşı təzyiqə söykəndiyini vurğulayıb.
Yekaterinburq Hadisələri Və Moskvanın Münasibəti
Ekspertin sözlərinə görə, Moskvanın Yekaterinburq şəhərində Azərbaycan vətəndaşlarının ardıcıl şəkildə saxlanılması və bu məsələnin şəffaf şəkildə ictimaiyyətə izah olunmaması digər xalqlara qarşı aqressiv və hörmətsiz münasibətinin açıq göstəricisidir. Xanım Marin əlavə edib ki, azərbaycanlıların günahsız yerə saxlanılması həm beynəlxalq hüquq, həm də insan haqları baxımından ciddi pozuntudur. Bu hal, təkcə Azərbaycan vətəndaşlarına deyil, eyni zamanda, bütün region xalqlarına qarşı təzyiq siyasətinin tərkib hissəsidir.
Beynəlxalq Nüfuza Vurulan Zərbə
Müsahibimiz vurğulayıb ki, bu cür davranışlar Rusiyanın beynəlxalq arenadakı nüfuzunu daha da zədələyir və onun təcridinə səbəb olur. Siyasi şərhçinin fikrincə, əgər dünya “Leninqrad modeli”nə əsaslanan qanunsuzluqla idarə olunsa, heç bir beynəlxalq sabitlikdən danışmaq mümkün olmayacaq. O, Avropa və dünya ictimaiyyətini bu kimi hallara qarşı daha sərt və prinsipial mövqe nümayiş etdirməyə, digər xalqların hüquqlarının pozulmasına laqeyd yanaşmamağa çağırıb.
Artan Təzyiqlər Və Qlobal Narahatlıq
Qeyd edək ki, son dövrlərdə adıçəkilən ölkə ərazisində Azərbaycan vətəndaşlarına qarşı artan təzyiqlər və saxlanılma hallarına dair məlumatlar ciddi narahatlıq doğurur və beynəlxalq müşahidəçilər tərəfindən diqqətlə izlənilir.
