“Vaşinqton Türkiyə ətrafında yaranmaqda olan yeni bir konfiqurasiyanın qarşısını almaq istəyir”. Bunu açıqlamasında konfliktoloq Üzeyir Şəfiyev ABŞ dövlət katibi Entoni Blinkenin noyabrın 5-də Türkiyəyə olacaq səfərini şərh edərkən deyib: “İsrail-Fələstin münaqişəsi fonunda dünya dövlətləri iki hissəyə bölünüb. Bu isə ona gətirib çıxarıb ki, Türkiyə və onun ətrafında olan dövlətlərin bloku yaranıb. Türkiyə həm İsrail, həm də Fələstin dövlətinin varlığını qəbul edir və problemin də bu şəkildə həllini istəyir. Amma ABŞ, Fransa və Böyük Britaniya kimi dövlətlər barışdırıcı mövqedən çıxış etmirlər. Onlar daha çox prosesin gərginləşməsinə çalışırlar. ABŞ-ın dövlət katibi Entoni Blinken İsrailə səfəri zamanı bildirib ki, bura bir yəhudi kimi gəlib. Bayden də İsrailin addımlarını dəstəklədi. Bu hadisələr fonunda da Türkiyə və onun ətrafında olan dövlətlər yeni bloklaşma yaratdılar”. Ekspert qeyd edib ki, Ərdoğan İsrail-Fələstin münaqişəsilə bağlı hətta beynəlxalq sülh konfransı platformasını təklif edir və bununla da prosesdə əsas söz sahibinə çevrilir. Həmsöhbətimiz qeyd edib ki, Blinkenin bu səfəri Qərbin düşmənlərinin birləşməsindən əndişələnməsi ilə bağlıdır:”Artıq Yaxın Şərq məsələsində Türkiyə, İran, Rusiya, Çin tandemi yaranır. Bu əndişə ABŞ-ı tez-tələsik Türkiyəyə yönəlik addımlar atmağa vadar edib. Vaşinqton bu səfərlə Türkiyə ətrafında yaranmaqda olan yeni bir konfiqurasiyanın qarşısını almaq istəyir. Blinkenin səfəri Vaşinqtonun Türkiyəni itirməmək, onun rəqiblərilə yaxınlaşmasının qarşısını almaq məqsədi daşıyır. Görünür ki, Bayden və digər ABŞ rəsmilərinin çağırışları artıq İsraili sakitləşdirmək istiqaməti almağa başlayıb. Bu da Türkiyənin öz mövqeyini qəti şəkildə ortaya qoymasından sonra baş verir”. Qeyd edək ki, ABŞ dövlət katibi Entoni Blinken noyabrın 5-i bazar günü Türkiyəyə səfər edəcək. Səfər çərçivəsində o, Türkiyə xarici işlər naziri Hakan Fidanla görüşəcək və bu görüşdə İsraillə HƏMAS arasındakı müharibəni müzakirə edəcəklər.
Mənbə
Xeberxetti.com