ABŞ kəşfiyyatı Kremlə pilotsuz təyyarənin hücumunda ukraynalıların əli ola biləcəyinə inanır. Kəşfiyyatçıların fikrincə, hadisənin arxasında Ukrayna xüsusi əməliyyat qüvvələri dayana bilər.
Xeberxetti.com bu barədə CNN-ə istinadən xəbər verir. Nəşrin yazdığına görə, Amerika kəşfiyyatı Ukrayna rəsmilərinin Kremlə hücumda bir-birini ittiham edən səs yazılarına diqqət çəkib. Bu, ABŞ-ı hadisədə ukraynalıların əli ola biləcəyi qənaətinə gəlməyə vadar edib. Dinlənilən bəzi danışıqlarda Ukrayna hərbi və kəşfiyyat sahəsinin nümayəndələri hücumun xüsusi əməliyyat qüvvələri tərəfindən həyata keçirildiyini ehtimal edirlər. “Lakin ABŞ kimin məsuliyyət daşıdığına dair qəti bir nəticəyə gələ bilməyib və hadisənin arxasında Ukrayna qrupunun ola biləcəyini çox az əminliklə qiymətləndirir”, – CNN bildirib. ABŞ rəsmiləri deyirlər ki, Ukrayna prezidenti Volodimir Zelenskinin və ya rəsmilərin əməliyyata göstəriş verməsi ehtimalı azdır. Kəşfiyyat həmcinin hücumun dövlət tərəfindən maliyyələşdirilməsi ehtimalını da istisna edib. Nəşrin məlumatına görə, Kreml hücumdan sonra daxili təhlükəsizlik sistemində dəyişikliklər edib. Rusiya prezidentinin sözçüsü Dmitri Peskov da Moskvanın hava hücumundan müdafiə sisteminin gücləndiriləcəyini açıq şəkildə bəyan etmişdi. Mənbələr CNN-ə bildiriblər ki, Kremli vuran pilotsuz təyyarələr kiçik olub. Lakin onların Ukraynadan Moskvaya uça bilib-bilməyəcəyi məlum deyil. Xatırladaq ki, mayın 3-nə keçən gecə Moskvanın mərkəzində partlayış səsləri eşidilib. Daha sonra Rusiya hakimiyyəti Kremlə pilotsuz uçan aparatlarla hücum olduğunu elan etmişdi. Aytən Zəhra Xeberxetti.com
Teqlər: